Shillong, Kyllalyngkot 11: Sa tang katno katne sngi ka Jylla kan sa sakhi ia ka jingsdang jong ka 6th Meghalaya Games, bad mynta ki jingpynkhreh pynkhrum ia ki jaka ialehkai kila iaid shaid shaid ban pyndep bad kila don ruh kiba la dep ban pynbiang pura lut.
Ki bor Distrit jong ka West Jaintia Hills bad ki nongpyniaid kin pynthikna ba ia ki jaka sah, ka bam, ka leit ka wan bad ki jing donkam kin dei kiba la pynkhreh thikna bha khnang ba kane ka lympung iakob ialehkai kan long kaba iaid beit.
Ka Meghalaya Games kaba 6 kan kynthup ia ki 29 tylli ki jingialehkai kaban sdang naduh ka 20 tarik u Kyllalyngkot haduh ka 25 tarik u Kyllalyngkot 2025.
Artylli ki jingialehkai kin long ha Shillong bad kine ki kynthup ia ka jingiakob jngi ne Swimming ka ban long ha Caroline Swimming Pool, Shillong bad ka Golf ha Assam Rifles Golf Course, Laitkor.
Ia kiwei pat ki jingiakob kiba kynthup ia ka Archery, Arm Wrestling, Athletic, Badminton, BasketBall Boxing, Cycling, Football, Gymnastic, Judo, Karate-Do, Kho-Kho, Muay Thai, Shooting, Softball, sports climbing, Table Tennis, Taekwondo, Lawn Tennis, Volleyball, weightlifting, wrestling, wushu, Traditional sports, Roll Ball, Yogasana bad Lawn bowling kin long ha kylleng ki shnong ha ka sor Jowai, Wahiajer bad Khliehtryshi jongka West Jaintia Hills District.
Ki nongiashimbynta baroh kin don ym duna ne palat ia ka 3899 ngut.
Ka jingplie pyrda ia ka Meghalaya games kan long ha ka 13 tarik u Kyllalyngkot ha ka por 1.00 mynsngi ha District Library Auditorium, Mynthong, Jowai bad yn plie ia kane ka lympung ialehkai da u Myntri ka tnad Sports and Youth Affairs u Bah Shakliar Warjri kum u Kongsan bad u MLA ka Jowai uba long ruh u Chairman ka MUDA Bah Wailadmiki Shylla kum u kongsan symbud.
