Shillong, K’lyngkot 07: U Myntri Rangbah ka Jylla un pyniaid ia ka Cabinet ba arsngi kynthih ha Sohra ha ka 10 bad 11 tarik Kyllalyngkot.
Baroh ki Myntri Sorkar bad ki Heh Ophisar ka Sorkar Jylla kin iashimbynta ha kane ka jingialang.
Ka jingthmu jong kane ka jingialang ka long ban ai ka rynsan ia ki Tnad Sorkar ba kin pynsngew iala ki jong ki prokram bad ki sienjam ba kila shim bad ruh ban iakren ia ki jingeh bad ki jingdonkam ba lah ban shim ha ka ban lah pynseisoh ia ka thong bad ki jingthmu baroh,
Haba kren sha ki lad pathai khubor, u Chief Secretary Bah DP Wahlang ula ong “Baroh ki Tnad kin iashonglang bad ki dkhot jong ka Kynhun Myntri bad kin ai ia ki jingbatai halor ki lynti ba kin shim ha u 2025, kaei ka plan ba ki don, kiei ki skhim, kiei ki thong ba ki tnad ki kwah ban leh ha u snem 2025”.
U pyntip ba ka kynhun Myntri kan iakynduh ruh ia ki Self Help Group jong ka Thain. Kin sa leit ruh sha ki thain Nohriat, kin sa iakynduh ia ki SHG jong ka thain ha ka 11 tarik bad kin sa wanphai biang sha ka jingialang bad ki tnad bapher bapher.
