Kyntu u CM ban pynheh ia ka SASCI na ka Sorkar Pdeng

Shillong Nohprah 21: U Myntri Rangbah ka jylla u Conrad K Sangma ha ka sngi Thohdieng ula ban jur ia ka jingdonkam ban bteng bad pynheh ia ka Special Assistance to States for Capital Investment (SASCI) scheme, da kaba kyrpad ban mang pisa kaba palat T.1,50,000 klur na ka bynta u snem mang tyngka u ban wan.

U Myntri Rangbah ula pynpaw hakhmat jongka Myntri ka Sorkar Pdeng kaba khmih ia ka Pla Tyngka ka Nirmala Sitharaman ha ka Pre-Budget Consultation kaba la long ha Jaisalmer, ha kaba ula pynapw ba ka SASCI scheme ka long ka jingiarap ïa ki Jylla, khamtam ki jylla ka thain shatei lam mihngi ban leh ia ki projek kiba kongsan kiba kyntiew ia ka roi ka par bad pynbha ia ka jingim jongki nongshong shnong.

Ula pynpaw ba dei ban ai jingithuh ia ki jingeh kiba kyrpang kiba mad da ki jylla ka thain shatei lam mihngi bad dei ban bhah kyrpang T.10,000 klur hapoh jongka SASCI scheme thik na ka bynta ki 7 tylli ki jylla ka thain shatei lam mihngi lait noh ia ka Assam bad ula pynpaw ruh ba ka jingling jingman jong ki jaka ha ka thain kala lam sha ka jingkiew dor jong ki tiar ki tar haba tei ia kino kino ki jingtei kaba long hapdeng jongka 35% shaduh 50% kaba palat ban ia kiwei pat ki thain.

Ula kyntu ruh ban buh 1000 tylli ki Citizen Digital Service Delivery Centers (CDSDC) ha kylleng ka jylla Meghalaya ha kaba kine ki Center kin pynbiang ia ki paidbah ban ioh ia ki jingshakri na ki tnad sorkar bapher, kum ki prokram kiba iadei bad ka imlang sahlang, ki Bank, ka koit ka khiah bad ka pule puthi khamtam eh ha ki jaka kiba don ha ki thain nongkyndong ha kaba ka jingnang jingstad ki briew halor ka Digital Literacy ka dang duna bha bad kitei ki center kin ai jinghikai ruh ia ki nongshong shnong ban tip ia ki sap ki phong kiba iadei bad ka Digital.

Nalor kane ban ai jingkyrshan ia ki Village Organizations kiba don ha Meghalaya, ha kaba bun ki Self-Help Group (SHG) kiba pyniaid da ki kynthei ki dang pyrshang ban pynheh ia ki kam khaii pateng ki jongki. Ban pynbiang ia ka jaka kaba shngain ia ki ba kin trei kin ktah bad ban kyntiew ia ka sap ka phong khaii pateng ka jongki bad kumta u Conrad ula tyrwa ban pynheh ia ka SASCI scheme ban pdiang ia ka jingkyrshan pisa na ka bynta ban tei 1000 tylli ki VO Service Delivery Center ha kylleng jong ka jylla bad ula kyntu ia ka Ministry of Finance ban pdiang lem ia kane ka jingtyrwa ban kynthup lang ha ka jingbei tyngka lyngba ka SASCI scheme.

U Myntri Rangbah ula kyntu ruh ba ka jingai jingshakri ki Bank kadei ban poi sha ki paidbah kiba sah ha ki thain nongkyndong jong ka jylla Meghalaya bad ban pynshlur ia ki Bank ban pynkhlain ia ka jingdon nongtrei ka jongki khnang ba kin lah ban ai ia ka jingshakri kaba kham bha ia ki paidbah.

Ula pynpaw ba watla la weng noh ia ka kyndon jong ka jingbun briew kaba 1 lak ngut, hynrei ka jingmang pisa jong ka AMRUT 2.0 ia ka thaiñ shatei lam mihngi ka dang long kaba duna bha, ha ka 2.68% na ka pisa baroh kaba T.66,750 klur, kaba la hiar sha ka 1.52% khlem da kynthup ïa ka Assam. Kumta ban weng ia kine ki jingduna, dei ban pynkiew ia ka mang tyngka jong ka AMRUT ha ka mang tyngka mynta u snem bad ban wanrah ia ka mang tyngka ba kyrpang na ka bynta ka thain shatei lam mihngi bad ia ki sor kiba don ha ki jaka lum ban shimkhia ia ki jingeh kaba ki mad haba ki tei ia ki jingtei bapher ryngkat bad ka pynbiang ia ki jingdonkam ki kam pynroi ha ki jaka sor.

U Myntri Rangbah ula tyrwa ruh ia ka jingpynlut lang kaba mar 50-50 ha ka jingpyntreikam bad ha ka jingpynlut ha kaban sumar hapoh ka Jal Jeevan Mission na ka bynta ki 2-3 snem kiba nyngkong da kaba ithuh ia ka jingeh kaba ka thain ka mad ha ka ioh ka kot bad ka jingling jingman jong ki jaka. Kumta da kaba iatreilang yn lah ban iarap ia ki jylla ban lah ban pyntreikam ia katei ka mission ba kan long kaba neh.

Nalor kane, ula tyrwa ruh ba lyngba ka Lakhpati Didi Scheme, ka Meghalaya ka don jingthmu ban pynkhlain ia ka jingtreikam ki longkmie kiba ialam ia ki karkhana rit bad ban pyniar ia ka ioh ka kot ka jongki. Kumta ka jylla ka tyrwa ban kyntiew ia ka jingai ram na ka T.3 lak sha ka T.5 lak ban kyrshan ia ki karkhana kiba la don lypa kiba la pyniaid da ki dkhot jong ki Self-Help Group (SHG).

U Conrad Sangma ula pynpaw, da kaba pynbeit ia kitei ki bynta kiba kongsan bha bad ban bteng ia ka jingai jingkyrshan pisa jong ka SASCI, ban mang pisa kyrpang ia ki jylla ka thain shatei lam mihngi, ban buh ia ki Digital Service Center, ban kyrshan ia ki Village Organization, ban pynheh ia ka bhah tyngka bad pynkhlain ha kaba iadei bad ka Digital Literacy, kumta ka Myntri ka Sorkar Pdeng kaba khmih ia ka Pla Tyngka ka don ia ka bynta kaba khraw na ka bynta ban pynkylla ia ka imlang sahlang ha ka jylla Meghalaya.