Shillong, Nohprah 20 : U Chairman ka Regional Committee ka West Khasi Hills bad Myntri Sorkar Bah Paul Lyngdoh ula ong ba ula iakren bad u Chairman ka Committee na Assam ban pynsdang biang ia ka jingiakren halor ka Langpih Sector.
Ka Langpih sector ka dei kawei na ki hynriew tylli ki jaka iakajia ba dang sah ban iapynbeit hapdeng ka Meghalaya bad Assam.
Haba iakren bad ki nongthoh khubor, u Bah Paul ula ong “Nga kwah ban iathuh ha phi ba ngi la dep pynpaw ia ki jingsngew jong ngi sha ka Committee na Assam”.
Ha ka kyrdan ki DC, u DC ka West Khasi Hills ula iakren bad u DC ka Kamrup District. Nga ruh nga la iakren bad u Chairman Patowari. Haduh mynta hi k aka jingmih kam da long kaba sngewtynnad.
“Hynrei ngi kwah ba ka jingiakren kan dang iai bteng bad kyrmen ba ngin sa ioh iakynduh noh shen” ula bynrap.
Ha u bnai Risaw, u Bah Paul ula pyntip ba ia ka kaiphod ba khatduh yn sa aiti sha ka Sorkar Jylla tad hadien ka jingleit iajurip lang bad ka Committee ka Assam sha ki jaka ba iakajia hapoh ka Langpih sector.
U pyntip ba ka Regional Committee ba u khlieh kala dep iasam ia ki kot ki sla bad ka Assam ban pynksan ia ka jingkam trai jong ka Meghalaya ia ki 54 tylli ki Shnong kiba hap hapoh ka Langpih sector ha ka jingiakynduh ba khatduh ba long ha Hotel Pinewood.
“Ngi la dep ai ia ki kot ki sla. Ka jubab ka long kaba sngewtynnad bad ngi donkam ban jam satang ia uwei u mawjam-kata ban jurip ia ki jaka ba shah ktah khnang ba ngin lah iakynduh ia ki nongshongshnong jong kine ki jaka. Dei tang kane kaba sah mynta, kaba ngi hap ban jam lyngba” ula ong.
