Nongpoh, Nohprah 20: Ka Ri Bhoi District Christmas Committee sa shisien pat kala pynthaba ïa ka sor Nongpoh lyngba ki jingpynriam ban pynphuh pynphieng ïa ka sor hashwa ka jingpdiang ïa ka jingwan long briew u Trai Jisu Khrist lane ka Christmas.
Ïa kane ka jingpynriam ïa ka sor Nongpoh ba kynthup ia ka syngoid ba la kha ïa u Trai Jisu Khrist, la plie da u Bah Mayral Born Syiem, MLA ka Nongpoh Konstituensi, u Samla Anthony Suchiang, Secretary ka shnong Nongpoh, u Bah Donald Rymbai President ka Ri Bhoi District Christmas Committee nalor kiwei kiwei ki riew rangbah ka thaiñ.
Haba kren ha kane ka prokram, u Bah Mayral Born Syiem u la ai ka jingïaroh kaba khraw ïa baroh ki nongkitkam ka Christmas Committee jong ka Ri Bhoi District kiba man u snem ki ju shim ïa ka bynta ban pynitynnad ïa ka sor Nongpoh kumjuh ruh ban shna ïa ka syngoid u Trai Jisu Khrist kaba dei shibynta ban pynphuh pynphieng ïa ka jingrakhe ïa ka jingwan long briew jong u Trai Jisu Khrist sha kane ka sla pyrthei.
U la ong ruh, ba kane ka jinglah jong kane ka Komiti ban shimti ia ka kamram ban pynphuh pynphieng ia ka Sor Nongpoh ka long shisha kaba dei ban ai jingïaroh, ka ban wanrah ïa ka jingieid jingïatylli hapdeng ki paid bynriew baroh kiba im ha sor Nongpoh.
Ula ai ka jingkitbok kitrwiang ruh ïa kane ka komiti ba kan nang lah ban pynim ïa kane ka mynsiem ban shakri Blei lyngba kum kine ki kam babha ha imlang ka sahlang.
