Shillong, Nohprah 20 : Ka Meghalaya Board of School Education (MBoSE) kala pynbna ban pynkynriah noh ia ki katto katne ki sobjek thoh eksam jong ka SSLC bad HSSLC bala buh ha ka 21 tarik Rymphang bad 24 tarik Rymphang namar ka jingdon jongka elekshon MDC.
Ka Sorkar Jylla dang khyndiat sngi, kala pynbna ban pynlong ia ka elekshon sha ka Iingdorbar KHADC bad JHADC ha ka 21 tarik Rymphang bad ka jingniew vote kan long ha ka 24 tarik Rymphang.
Namar kane, ka MBoSE kala pynbna ban pynkynriah noh ia ki sobjek thoh eksam bala buh ha kane ka sngi sha kawei pat ka tarik.
Kat kum ka jingpynbna, ha ka eksam SSLC, ka MBoSE kala pynkynriah ia ka sobjek Mathematic/Special Mathematics na ka 21 tarik Rymphang sha ka 25 tarik Rymphang.
Ha ka HSSLC, ka MBoSE kala pynbna ba ia ka sobjek Physics ryngkat ka History la pynkynriah na ka 24 tarik Rymphang sha ka 6 tarik Lber, ia ka sobjek Sociology la pynkynriah n aka 24 tarik Rymphang sha ka 18 tarik Lber katba ia ka Vocational subject/Paultry Farming-IV bad Computer Technique-IV la rah na ka 21 tarik Rymphang sha ka 19 tarik u Lber.
