Shillong, Nohprah 19 : U Symbud Myntri Rangbah ba khmih ia ki kam pynroi sor Bah Sniawbhalang Dhar, ula kular ba ka Sorkar kala don ha thmit ban pyndep noh ia ka jingpynkynriah ia ki briew ba sah ha Them Metor, Them Iew Mawlong.
Ula pyntip ba ka jingiakren ka dang iaid hapdeng ka Sorkar Pdeng bad ki bor shipai haba iadei bad ka jingai ia ka jaka shipai ha Shillong ban pynkynriah ia kine ki longiing na Them Metor.
Haba iakren bad ki lad pathai khubor, u Bah Sniawbha ula ong ‘Wat khuslai, ngin sa pynbeit ia ka. Na ka por sha ka por, nga la dep batai sha phi, kumta nga ong ba kala don ha thmit ban shim rain oh. Ngim shym la iohthiah kum ka Sorkar-ngi la buddien khlem shongthait ia kane ka kam. Ka dei ka kam kaba heh bad bala sahteng, kumta ka shim por ia ngi ban rai ha ka rukom ka ban pynthikna ba nym don mano manor uh ba mong. Kane ka dei ka jingthmu”.
Halor ka jingiakren ka Sorkar bad ka Sorkar Pdeng ban ai jaka, u Bah Sniawbhalang ula ong “U Myntri Rangbah ula iakynduh ia ki, hynrei ka jingiakren kam pat shym la poi sha ka jingshim rai. Watlada ngim ioh ia ka jaka shipai, ngi la don lypa iala ka jong ka blueprint”.
Haba kylli la ka Sorkar ka don jingthmu ban pynbeit ia kane ka kam hashuwa ban kut une u snem mang tyngka, u Bah Sniawbha ula jubab “Kane ka dei ka jingthmu, hynrei ngin sa iapeit. Ngi la pyrshang ia kata hi hynrei to ngin sa iapeit”.
La ka Sorkar ka lah ban pynbeit noh ia ka kam hashuwa ka Khristmas ne snem thymmai, u Bah Sniawbhalang ula ong “Ka Khristmas bad snem thymmai ka lah ban eh namar ka por kala lyngkot bad baroh ki Ophis ruh kila khang lut. Ka lah ban jia tang ha u snem 2025”.
