Shillong, Nohprah 19: Ka St Anthony’s Cricket Academy bad ka Shillong Cricket Academy, kila iohrah ia ka nam lahduh ha ka U-19 Girls’ bad U-14 Boys’ ha ka 1st SYM Inter Academy Tournament kaba la long ha ka Sngi Baar.
Ha ka jingiakhun ha kitei ki ar tylli ki phainal kala long hi hapdeng kitei ki kijuh ki kynhun ka St Anthony’s Cricket Academy kala jop ia ka U-19 Girls kala jop da 38 run, katba ka Shillong Cricket Academy kala jop da 22 run ha ka jingialehkai kaba la long ha Don Bosco Mini Stadium.
Ia katei ka lympung iakob ialehkai Cricket la kyrshan da ka Meghalaya Cricket Association kum shi bynta ban kyntiew ia kane ka jingialehkai ha ka jylla.
Haba leit ban tied nyngkong eh, ka St Anthony’s kala kamai 105 run bad hap 4 wiket ha ki 15 over. Ka Dawanshisha Warlarpih kala kamai 38 run, ka Isha kala kamai 12 run bad ka Adelakmen kala kamai 11 run katba ka nongkawang bol ka SCA ka Philasyrpai kala ioh ban khur 2 wiket.
Ka SCA kaba la mih ban tied, ki nongialehkai kiba la mih shakhmat kiba kynthup ia ka Srijana kala kamai 14 run bad ka Laviola kala kamai 13 run. Hynrei hadien ba kine ki ar ngut kila hap noh kumta ki nongtied kiba la mih hadien kim shym la lah satia ban kamai run bun bad ka SCA kala kamai 67 run bad hap lut ki nongtied ha ka 14 over.
Ha ka jingiakhun ha ka Final jong ki shynrang, ka SCA kala lah ban ialehkai bha da kaba kamai 110 run bad hap 5 wiket. U Gautam ula kamai 36 run katba u Abdullah bad u Suraj kila ia kamai mar 20 run.
Ka St Anthony’s kaba la mih ban tied hadien kam shym la lah ban ialehkai bha ha kaba u Abhinav Khanal bad u Ram kila ia kamai mar 18 run. U Unmukt Deka ula ialehkai bha marwei da kaba kamai 14 run bad ym shim laout satia haduh ban da kut.
U Unmukt bad Zephaniah kila pyrshang ban thaw ia ki lad ki lynti ban tied bha hynrei ha kaba khatduh hi ka St Anthony’s kala dun da 22 run ban ioh khur ia ka jingjop.
