Shillong, Nohprah 16: Ka Meghalaya SSA Schools Association (MSSASA) ha ka sngi Nyngkong, kala rai ban weng noh ia ki jingiakhih khnang ban pynbteng ia ka jingiakren bad ka Sorkar Jylla ha kaban pynbeit ia ki jingeh jong ki palat 13000 ngut ki nonghikai SSA hapoh ka Jylla.
Haba kren sha ki lad pathai khubor, u President ka MSSASA Bah Aristotle C Rymbai ula pyntip ba ka Association kala shim ia lai tylli ki rai ha ka jingialang General meeting ba long ha madan Students, Jaiaw, hynne ka sngi hadien ba ka Sorkar kala khot ia ki sha ka jingiakren ha ka 18 tarik Naiwieng bad 4 tarik Nohprah.
“Ngi la iarai lang ban weng noh ia ka jingiakhih bala pynbna naba ngi la rai ban pynbteng ia ka jingiakren bad ka Sorkar Jylla” ula ong.
U Bah Rymbai ula bynrap ruh ba ka Association kala rai ban ai jingmut bad kyrpad ia ka Sorkar ba kan pyllait noh ia baroh ki nonghikai SSA kiba rung kam ha lane hashuwa ka 1 tarik Naitung, 2020 ba kin pyndep ia ka eksam Meghalaya Teachers’ Eligibility Test (MTET).
“Kane ka long namar kat kum ka jingpynbna bala pynmih da ka Sorkar Jylla ha ka 1 tarik Naiwieng, 2020, kala kren shai ba ka eksam MTET ka dei kaba kongsan ha Jylla Meghalaya. Kumta, ngi la iarai lang ba ka Sorkar ka dei ban mynjur ha ka ban pdiang ia kane na ka bynta ki nonghikai SSA kiba la rung kam ha lane shuwa ka 1 tarik Naitung, 2020 ba kin ym donkam ialeh shuh ia ka eksam MTET” ula ong.
Nalor kane, ka MSSASA kala dawa ia ka Sorkar Jylla ban thaw ia ka Empowered Committee ba kan nang iakren halor ki jingeh jong ki nonghikai SSA, kaba kynthup ia ka jingdawa ban wanrah ia ka Poicy ba iadei bad ka jingshngain ka jingshakri jong ki nonghikai SSA hapoh ka Jylla Meghalaya.
Ki dkhot jong kane ka Empowered Committee ka dei ia kaban kynthup na ka tnad Ain, Personnel, Finance, Planning, Education bad ki dkhot na ka Association, ong u Bah Rymbai.
