Leh aiu ka Sorkar u Dr Mukul ha ki phra snem ia ka jingkhaii tuh ia u dewiong
Shillong, Nailar 25: U Myntri Rangbah ka Jylla Conrad Kongkal Sangma hynne ka sngi palei ula kyntait ia ka jingkynnoh ka All India Trinamool Congress (AITC) ba ka Sorkar Jylla ka iarap ban pyniaid ia ka kam tih dewiong beain ha ka Jylla.
U Myntri Rangbah ka Jylla ula ther tyngeh ruh ia u Nongialam ka AITC Dr Mukul halor ka jingkynnoh ia ka Sorkar MDA ba ialam da ka NPP haba pynkynmaw ia u halor ka jingbym lah ban leh eiei pyrshah ia ka kam tih dewiong beain ha ki phra snem ba u long kum u Myntri Rangbah ka Jylla.
“Kam don satia kano kano ka jingiarap. Ha ka jingshisha ka dei ha ka por ba synshar ka Liang Pyrshah ba ka khlem leh eiei pyrshah ia kane ka kam beain” ong u Myntri Rangbah haba iakren bad ki nongthoh khubor.
“Ka dei tad hadien ba shimti ka Sorkar MDA ba ialam da ka NPP, ba ngi la sdang ban pyntreikam ia ka MMDR Act, ngi la nang pyrkhing shuh shuh ia kino kino ki briew kiba donkti ha kum kine ki kam beain” ula ong.
U Conrad ula pyntip ba ki bor Sorkar kila file case la bun tylli bad kila pynshitom ruh da ki spah ngut ki briew. “Bun ngut ki briew kila shah kem ruh. Ta ka daw kam long ban shu kdew kti. Nga tharai, ka Liang pyrshah kan hap sngewthuh ia kiei ki kam ba ka khlem leh haba ka don ha ka bor shuwa ban kdew ia ki kti sha kiwei” ong u Conrad.
Halor ka jingiap u nongtih par dewiong dang shen bad jingmynsaw uwei na ka jingtwa ka par ha West Khasi Hills, u Myntri Rangbah ula ong ba ki Pulit kila kem ia u trai jong kane ka par.
“Ki Pulit ki don ban kem iano iano ruh lada ki leh ia ki kam beain bad ka ain ruh ka don ban ai jingpynsajia ia kine ki briew kiba donkti”ula ong.
Hynrei ula pynpaw pat ba kiei kiei baroh ki don da u pud namar ki jingeh ban poi sha kine ki par kiba don sha kyndong kynshrot. “Ki don ki par ba ki briew ka Sorkar kim lah satia ban poi bad hap iaid da ki kjat. Ta ka daw ka long kaba donkam ban sngewthuh ia kum kine ki jaka” ula ong.
