Shillong, Nohprah 10 : U Myntri Rangbah ka Jylla Conrad K Sangma hynne ka sngi Ba-ar, ula plie ia ka Science Block ba thymmai bad ka jingpynheh ia ka kamra klas ka Block-B jong ka Sngap Syiem College ha Mawkyrwat, South West Khasi Hills District.
Haba ai jingkren, u Myntri Rangbah ula ban jur ia ka jinglong kongsan ban kynshew ha ki samla naba tang 6 lak ngut ki briew hapoh ka Jylla ki dei kiba la palat ia ka 45 snem ka rta katba kiwei kiwei ki dei kiba dang khynnah.
Ula ban jur ba kumno ka pule dangle kala shim ia ka bynta kaba khraw eh ha ka roi ka par jong kiwei pa kiwei ki briew bad khatduh ia ka jingsyniang jong ki sha ka Jylla bad ka Ri. Ula bynrap ba ki kyrdan pule bapher bapher kila ioh jingmyntoi bha na ki prokram bapher bapher jong ka Sorkar.
“Ha jan baroh ki kyrdan pule, ka Sorkar kala leh eiei da kaba wanrah ia ki policy, ki prokram, ka jingkyrshan ia ki jingtei bad jingkyrshan haba iadei bad ka jingthungkam ia kaba nga sngewkmen ba ka College fi ruh ka dei shibynta mynta ka sngi” ula ong.
U Myntri Rangbah ula pynbna ruh ia ka rai jong ka Kynhun Myntri hynnin ka sngi, ba ka Science bad Commerce Stream kin sdang noh ha ki 5 tylli ki Collge Sorkar kiba don ha kylleng ki jaka jong ka Jylla kiba kynthup ia ka Sohra, Mawphlang, Williamnagar, Baghmara bad Mahendraganj.
“Kam long kaba lehhok ba ki samla pule kim lah satia ban jied ia ki sobjek ba ki kwah ban pule bad kumta, ka dei ka kamram jong ngi ban pynthikna ba ngi lah ban ai ia ki lad ban jied ia ki samla pule kumba la kdew da ka NEP” ula ong.
Ha kajuh ka por, u Myntri ula pynna ruh ban mang pisa na ka bynta ban thied ia ki school bos bad ruh ia ka jingnoh synniang ba T.20 lak na ka bynta ban pynroi ia ka college.
Kiba la iadonlang ha kane ka sngi ki kynthup ia u MLA Bah Renikton L Tongkhar bad u MDC ka KHADC Bah Carnes Sohshang.
