Khein iap ka MMRSB ia ka result thungkam nos ba ujor ka KSU ia ka jingmih kynrum kynram

Shillong, Nohprah 10 : Ka Meghalaya Medical Recruitment Service Board (MMRSB) kala rai ban khein iap noh ia ka result barim bad pynmih da kaba thymmai, ban thungkam ia 164 ngut ki staff nurse hadien ba ka seng Khasi Students’ Union (KSU) kala ujor ba ka rukom pyniaid ia ka eksam ka long kaba bun ki kynrum kynram.

Ia kane la pyntip da u samla Reuben Najiar Chairman Employment Monitoring Cell ka KSU, uba la pyntip ba kane ka rai jong ka MMSRB ka dei kaba la shim hadien ka jingiakynduh jong ka Seng ia ka Myntri ka Koit ka Khiah Kong Ampareen Lyngdoh bad ki Heh Sorkar nalor ki dkhot ka MMSRB ba long ha ka 30 tarik Nailur, 2024.

Kat kum ka jingong jong u, ka Seng kala dawa ban pynduh noh ia ka result kaba rim namar ka jingmih bun ki kynrum kynram ha ka jingpyniaid ia ka eksam kynthup ia ka jingsam ia ki jingkylli kiba don jingbakla, ka jingbakla ha ka answer key, ka jingbym sngewhun ia ki mark ba ki nongialeh eksamin ki ioh bad kiwei kiwei.

U pyntip ba ka MMSRB kala thaw ia ka Grievance Cell ban ailad ia ki nongthoh eksam ba kin ai jingujor lada ki don eiei kaba long pyrshah kynthup ia ka jingioh ia ki jingkylli kiba bakla, ban ioh peit ia ki answer sheet ban pynthikna ia ki marks ba ki ioh bad kiwei kiwei.

U iathuh ba kane ka Grievance Cell kala ioh pdiang haduh 101 tylli ki jingujor na ki nongthoh eksam bad lap ruh ba don bun tylli ki jingkylli kiba bakla. U ong ba hadien kane ka jingshem, ka MMSRB kala pynbeit ia kine kiei kiei baroh bad kala pynmih ia ka result thymmai ha ka 9 tarik Nohprah, 2024.

Ka KSU ka kyntu ia ka Sorkar bad ki bor ba pyniaid ia ki eksamin thungkam bapher bapher ba kim dei ban lehkai bad ka jingim jong ki samla wadkam.

“Ka Seng kan ieng rasong ban pyntikna ba ka thungkam thungjam ha ka jylla ka dei ban long kaba khuid khlem noh shiliang shano shano ruh bad kiba dei hok ban ioh ia ka kam kin ioh kita” ula ong.