Shillong, Nohprah 09: Ka Sorkar Jylla hynne ka sngi Nyngkong, kala ai jingmynjur iaka jingpynkylla thymmai ia ka Meghalaya State Investment Promotion Facilitation Act, kaban ailad ia ka Investment Meghalaya Agency (IMA) ban thied ia ka jaka bad ban ai pat sha ki nongkynshew kam (investor).
La pyntip ia kane da u Myntri Rangbah ka jylla Conrad K Sangma hadien ba la wai ka jingialang jong ka Kynhun Myntri ba la shim ia ki ar tylli ki rai.
Ka rai kaba nyngkong ka long ban pynthikna ba ia ki projek kiba heh dei ban wanrah sha ka Kynhun Myntri ban ioh ia ka jingmynjur.
Ula ong, mynshwa ki kyndon aiñ ki ailad ia ka committee jong ka IMA kaba khlieh da u Myntri Rangbah ban ai jingmynjur ia ki projek bad subsidy ba kyrpang kaba palat ia ka T.100 Klur jong ka jingbei tyngka.
Ula iathuh ba ka jingpynkylla ka ba-ar, ka long ba ka Investment Meghalaya Agency ka dei ruh ka Agency kaba mynjur ia baroh ki projek kiba la pyntrei, kynthup ban pynbiang ia ka jaka lada donkam.
“Ki don bunjait ki Agency kiba pynbiang ia ki jaka, kumta ha ka kam jngohkai la pynbiang da ka MTDC, ha ka kam karkhana la pynbiang da ka MIDC, ki katto katne ki bynta la pynbiang da ka tnad Urban Affairs. Ka IMA kam don ia ka kyndon ban thied ia ka jaka bad ban pynbiang jaka ia ki nongbei tyngka, kumta ngi lah pynrung ha ki kyndon ban ailad ia ka IMA ruh ba kan thied jaka katkum ka jingdonkam jong ki nongkynshew kam ban pyntreikam ia ki projek lada jia ba kim don satia kino kino ki tnad ne ki agency ki bym hap ha katei ka kyrdan ban pynbiang ia ka jaka, kumta ka IMA mynta kan long noh kum ka Agency kaban lah ban thied jaka bad ban pynbiang ia ki nongbei tyngka” ula ong.
Ka kynhun myntri kala mynjur ruh ia ka jingtyrwa ban thaw ia ka Governor’s Civil Defence Medal na ka bynta ka tnad Home Guards & Civil Defence.
 ban thied ia ka jaka bad ban ai pat sha ki nongkynshew kam (investor).){kind=link}