Shillong, Nohprah 04: Ka Tnad Tourism bad ka Meghalaya Tourism Development Corporation (MTDC), hynne ka sngi Balang, kila buh ia u mawnongrim na ka bynta ban tei pynbha ban pynkylla noh ia ka Orchid Hotel sha ka Aurika Hotel Shillong.
U Myntri Rangbah ka Jylla u Conrad K Sangma, ula ong ba kane ka projek kadei lyngba ka Public-Private Partnership (PPP) ha kaba T.124 Klur yn bei tyngka da ka Lemon Tree Hotels Ltd, ban pynlong ia kane ka projek kaba jop.
“Kane kan dei ka Five-Star Hotel kaban don 130 tylli ki kamra, ka Banquet hall bad kiwei kiwei ki jingdonkam kiba lah ban khring ia ki briew na kylleng ka ri India bad wat ia kiba nabar ri ruh kumjuh, khnang ba yn lah ban kyntiew ia ka kam jngohkai” ula ong.
Ula ong ba kane ka sienjam kam dei eh tang ban kyntiew ia ka kam jngohkai hapoh ka jylla hynrei kan iarap ruh ia ka MTDC ban ioh lum ia ka khajna.
Haba iaid shakhmat bad kane ka jingiatehkular, yn siew T. 5 Klur sha ka MTDC da ka Lemon Tree Hotels Ltd bad hadien kane man la ka snem kan siew T.2.5 Klur sha ka MTDC kum ka khajna ne ka jingshim wai ia ka jaka.
Ula ong, ba katei ka jingbei tyngka kan ym ai jingmyntoi tang ha ka liang ka kam jngohkai hynrei ia baroh kiba donbynta lang namar lada kiew ka kam jngohkai kam dei tang ia ka sorkar, ne ia ka Hotel ne u riewshimet uba iohnong hynrei ka imlang sahlang bad ki paidbah ruh ki iohnong lang namar ka kam jngohkai ka ktah ia baroh ki liang ia ka ioh ka kot jong baroh kiba donbynta lang ha ka imlang sahlang.
Katba u Myntri ka tnad Jngohkai u Bah Paul Lyngdoh ula ong, ba ka long ka sngi kaba ai ia ka jingsakhi ïa ka jingshisha ba ka Meghalaya kala kiew shakhmat ha ka kam jngohkai pyrthei bad kala kylla long kum ka jaka jngohkai pyrthei kaba ki nongjngohkai ka ri India kiN sngewtynnad bha ban wan hapoh jongu snem 2025.
Ula banjur ba ka kam jngohkai pyrthei ka ai kam kumba 50000 ngut ki briew bad na ka bynta ba ka kam jngohkai kan poi sha ka 50,000 ngut ha kane ka kyrdan kaba dang rit, ka pyni ba lada pynbha ia ki jingkhlain, ka jylla ka dei ban lah ban ktah ia ka jingkiew kaba ym duna ia ka 60% ha ki lai ne saw snem ban wan.
U Bah Paul Lyngdoh ula kyntu ruh ïa ka Lemon Tree Hotels Ltd ban pynneh beit ïa ka kyrteng jong ka “Orchid Hotel” namar ba kadei ka kyrteng jongu syntiew ba pawnam jong ka jylla Meghalaya, u ‘Lady Slipper Orchid’.
Ha kane ka jingialang la ioh ruh ia ka jingkren na u Chairman ka MTDC u Bah Sanbor Shullai, u Prashant Mehrotra u Chief Operating Officer ka South East jongka Lemon Tree Hotels Ltd, ki heh ophisar sorkar bad ki nongmihkhmat jongka Lemon Tree Hotels Ltd bad MTDC.
