Shillong, Nohprah 02 : Ki samla pule ba don ha ka lama North Eastern Hill University Students’ Union (NEHUSU) bad ka Khasi Students’ Union (KSU-NEHU Unit) ha ka sngi Nyngkong, kila pynbna ia ka rai ban shah pynlong noh ia ki klas naduh ka 3 tarik Nohprah.
Hynrei kila rai ba kin pynlong noh da jingiashong kyllain mungor ba arkynta ba khlem pud tad haduh ba urlong ka jingdawa ban weng noh ia u Vice Chancellor Prof Prabha Shankar Shukla na NEHU.
Haba iakren bad ki lad pathai khubor, u General Secretary ka NEHUSU Toniho Kharsati ula ong “Ka jingdawa ba hakhmat eh jong ngi ka long ban weng noh ia u VC ba mynta. Kala jan dap shibnai ba ngi khlem ioh pynlong klas hapoh ka skulbah bad haba buh ha ka jingmut jingpyrkhat ia ka lawei jong ki samla pule-ngim kwah ban pynpulom ia ka lawei ki samla tang namar ka jingbym lah treikam bha jong u VC. Ka NEHUSU bad ka KSU kila rai ban ailad long klas biang noh naduh ka 3 tarik Nohprah”.
Ula ong ba ki seng jong ki samla pule kila kyrpad ruh ia u VC-Incharge Prof N Saha ban khot ia ka jingialang ba kyrkieh ha kaban iakren ia ka academic calendar jong ka skulbah khnang ban pynthikna ia ka jingiaid beit iaid ryntih ki kam ki jam jong ka skulbah.
Haba pynpaw ba ka jinglong jingman kan sa jai jai noh lada u Prof Shukla um wan phai shuh sha NEHU, u samla Toniho ula ong “Hynrei, lada ngi shem ia kino kino ki jingthoh ne aiktien kaba wan na u VC ba u pyrshang ban wan rung sha ka skulbah, ki seng jong ki samla pule kin mih biang ban shim ia ki sienjam ba tyngeh ban nym shah ia u ba un wanrung ha ka skulbah jong ngi”.
Ula pyntip ba ki artylli ki seng jong ki samla pule kila rai ban pynjur ia ka jingiakhih da kaba pynlong ia ka jingiashong kyllain mungor tad haduh bala weng syndon ia u VC napoh ka skulbah.
“Ngi kwah ban phah ia ka khubor sha ki paidbah ba kane ka jingiakhih ka dang im bad ngi dang pynim ia ka da kaba pynlong ia ka jingiashong kyllain mungor naduh ka por 3 baje janmiet haduh 5 baje janmiet manla ka sngi. Ngi kwah ban pyni ba katba ym pat weng ia u VC ngi ru ngin ym pynsangeh ia ka jingiakhih. Hynrei, ngin pyrshang ban pynlong jai jai ia kane ka jingiakhih jong ngi” ula ong.
Une u Nongialam ki samla pule ula ong “Ngi la iengskhem ha ka nongrim ba ngin ym ailad shuh ia u VC ba un wan iuhkjat biang hapoh ka skulbah. Hadien, ngi la tip ba ula pynjlan ia ka shuti haduh ka 13 tarik Nohprah. Ngi ngeit skhem ba u VC u sngewthuh ba ka long kaba eh ia u ban wan biang sha kane ka skulbah haba khmih ba baroh ki kynhun na NEHU, ki Sengbhalang bad ki Shnong bad ka Jylla baroh kawei kila ngiah ia ka jinglong nongialam jong u bad ngim kwah shuh ba un dang wan iuhkjat hapoh ka skulbah.
 bad ka Khasi Students’ Union (KSU-NEHU Unit) ha ka sngi Nyngkong, kila pynbna ia ka rai ban shah pynlong noh ia ki klas naduh ka 3 tarik Nohprah.){kind=link}