Shillong, Nohprah 02 : Ka Sorkar Jylla kan sa shna sa 15 tylli ki Rahabilitation Centre na ka bynta ban ai jingsumar ia ki nongdih droks hapoh u 2025.
Haba pynbna ia kane ha ka sngi Nyngkong, u Myntri ka Tnad Social Welfare Bah Paul Lyngdoh ula ong “Ngin sa nang pynbun ia ka jingdon ki Rehabilitation Centre. Ngi dang bishar ia ki jingtyrwa ban don la kumno kumno sa 15tylli ki Centre hapoh u 2025”.
Ula ong ba ka Sorkar kala lah ban bei pisa ia ki Rehabilitation Centre bala pyniaid da ki Balang bad ki riew shimet.
“Ngi la lah ban bei tyngka ia ki la ka long shiteng ne pura bad kam dei satia kaba ngi shu ieh ha ki ba kin khmih dalade ia kane ka kam. Ngi la bei pisa ruh ia 9 tylli ki Centre ba long trai bad pyniaid da ki riew shimet hynrei ngi donkam ban pynbun sa 15 tylli ki Centre” ula bynrap.
Haba kylli halor ka jingiap ki arngut ki samla na Shillong ha ki Rehabilitation Centre ha Assam, u Myntri ula ong “Ngi la dep thh sha ka Sorkar Assam. Ngi la pan ia ka kaiphod. Ka shithi kala leit ruh na ka Deputy Commissioner ba pan kaiphod na ka tnad ba dei khmih ha Assam. Ha kine ki khyndiat kynta ban wan, ngan sa shong bishar kam halor kane ka kam”.
“Ha ka jingjia ba kham mynshuwa ia kaba la kynnoh shah lehbein ha Mizoram, ngi lah shimkhia bad tuklar ia ka kam. Mynta ka kyntu ruh ngi la thoh shithi bad u Principal Secretary jong ngi ula kren ia ki borkhmih ka Assam” ula bynrap.
Dang shen, u samla Rickelson Jyrwa ba sah ha Golflink bad u Meban Syndor ba na Mawlai Mawtawar, kiba leit shah sumar ha Better Living Wellness Foundation, Mangaldai bad ha Alive Again Foundation, Chandrapur, Hatsila, kila iap ha ka rukom ba pher bad pyn shankhmat bha.
