Shillong, Nohprah 02 : Ka Sorkar Jylla kala rai ba shen kan sa pynsdang noh ia ka jingkamai helicopter ban kit ia ki nongshangkai pyrthei sha kylleng ki jaka jngohkai hapoh ka Jylla.
Haba pyntip ia kane ha ka sngi Nyngkong, u Myntri ka kam jngohkai Bah Paul Lyngdoh ula ong “Ngi kham pynleit jingmut eh sha ki jaka jngohkai. Kala don lypa ka jingtyrwa ban pyniasoh ia kine ki jaka jngohkai na suin”.
“Ngi dang shu sdang mynta, hangno ba ngin pyniasoh da ki helicopter, tang ban kit ia ki nongshangkai pyrthei. Ngin sdang shuwa da ka Guwahati sha Shillong kaba mut ha Umroi Airport bad hadien kane ha Umiam, Sohra, Dawki bad New Shillong” ula bynrap.
Ula pyntip ruh ba ka Sorkar kan shim ruh ia ki sienjam ban pynbha ia ki lad pyniasoh da ki surok bad bynrap “Kum ka nuksa ka Mawsynram kaba ngi la shna ia ka museum, kaba donkam ka jingkynshew bha ha ka liang ka surok”.
Nalor kane, u Myntri ula ong ba ka jingwan jong ki nongshangkai pyrthei sha Meghalaya kala tam ia ka 15 lak mynta u snem. Kat kum ka jingong jong u, ka jingwan jong ki la khmih lynti ba kan kiew da 60% ha u snem 2025.
“Kumba phi iatip ka Skyscanner, kala dep leh ia ka survey bad shem ba ka Shillong ka dei ka jaka kaba kwah wan eh da ki nongshangkai pyrthei ka Ri India ha u 2025. Na ki 10 tylli ki jaka shangkai ba ki jied, ka Shillong ka dei kaba wan nyngkong eh, kaba mut ba hapoh u 2025, ka jingkiew ka jingwan ki nongshangkai kan ym duna ia ka 60%” ula ong.
Haba pynpaw ba kane ka khana jong ka jingkiew ka Meghalaya, u Bah Paul ula ong “Ha ki snem bala leit noh, ngim pat ju ioh ia kum kane ka jingithuh”.
Ula ong ba ha kane ka kynti da ka jinglah jong ka Sorkar ban pyniaid iew ia ka Meghalaya kum ka jaka shangkai pyrthei, ka Jylla kala ioh haduh T.199 klur ban pyntreikam ia artylli ki project bad kane kam dei satia ka kam kaba long kam kai.
