Pan pahara u Prof Shukla na ka Sorkar Pdeng ban leit shimti biang ia ka shuki Vice Chancellor ha NEHU

Kynnoh ba pynmih huri hura ka NEHUSU ba kynshoit u Prof Lakhon Kma

Shillong, Naiwieng 28: Wat hapdeng ka jingpyrshah jong kiba bun ba un wanphai biang shaka skulbah, hynrei u Vice Chancellor ka North-Eastern Hill University (NEHU) u Prof. Prabha Shankar Shukla, ula pan na ka bor ai jingiadaiada ialade na ka Sorkar Pdeng ba un leit ban shimti biang ia ka shuki VC ha ka 2 tarik u Nohprah.

Ha ka shithi kaba ula phah sha u Principal Secretary in-charge Higher Education, ka sorkar India, u Prof Shukla ula ong, “Ka jingshim shuti ka jong nga kan kut ha ka 29.11.2024 bad ngan leit ban shimti biang ia ka kam ha NEHU ha ka 02.12.2024.”

Ula kynnoh, “Nga la ioh ia ka jingtip ba ki riewshimkabu na ki kynhun bapher bapher jong ka skulbah, lyngba u In-charge Vice Chancellor, kila pyniaid be-aiñ ia ki kam ki jam kiba man la sngi jong ka skulbah bad kila pynmih ia ki hukum bad ki jingpynbna khlem ka jingioh bor”.

“Namar ka jinglong jingman ka bym shngain hapoh ka skulbah, nga kyrpad ban ai ïa ka bor jingiada kaba pura namar ka jingai jingiada na ka sorkar jylla kam pat long kaba biang. Katei ka jingbuh ia ki bor pahara kan ym pynthikna tang ia ka jingshngain ka jong nga hynrei kan noh synniang ruh na ka bynta ka jingshngain baroh kawei jong ka skulbah NEHU bad ki nongtrei jongka” pynpaw u VC ha ka shithi.

Ula pyntip ba ula aiti ia ki jingthoh ryngkat bad ka jingpynshai ia ki 4 tylli ki mat kiba la pan jingpynshai da ka Ministry of Education ha ka 23.11.2024.

Haba batai bniah shaphang ka jingjia, u Prof Shukla ula ong, “Ka NEHU Students’ Union (NEHUSU), kaba la kyrshan da ka NEHU Teachers’ Association (NEHUTA) hapoh ka jingialam u Prof. Lakhon Km,a kala pynmih ia ka huri hura hapoh ka skulbah naduh ka 25 tarik u Risaw 2024.”

Ula kynnoh ba ka NEHUTA kala pynmih ia ka jingklumar hashwa ban sdang ka jingialang jongka Academic Council kaba 113 ha ka 25 tarik u Risaw, 2024 ha kaba kam shym la shah ia ka jingialang jongka Academic Council.

“Hadien katei, kila leit rung jubor ha ka ophis jong u Registrar bad Deputy Registrar bad kila phah mih jubor ia ki bad khang tala ia ka ophis treikam ka jongki. Kila leit rung jubor ruh ha ka ophis jong u Vice Chancellor bad kila byrngem ia nga ba nga dei ban wengkam mardor ia u Registrar and Dy. Registrar. Ym shim la don kano kano ka kynhun ban ujor ne pynsngew eiei ne ban ai da ka jingthoh ban batai ia kid aw ban weng noh ia kitei ki ophisar” ula ong.

“Watla katta ruh nga la pyrshang ban batai bniah ia ki kyndon treikam bad pynthikna iaki ba yn sa leh ia kaba donkam ban pynbeit ia katei ka mat bad ban pynjaijai ia ka jinglong jingman. Katkum ka jingdawa ka jongki, nga lah dep ruh ban thung ia u Pro-VC, uwei naka bynta kawei pa kawei ka NEHU campus bad pan iaka jingmynjur na ka EC katkum ki kyndon jongka NEHU Act 1973,” la ong u Prof Shukla bad ka bynrap, “Watla nga la pyrshang ban iakynduh bad ban iakren na ka bynta ban pynbeit ia ka jingeh, ka NEHUSU bad NEHUTA kila nang pynheh ia ka jingiakhih da kaba pynlong ia ka jingshah thngan hakhmat ka ophis treikam jongu VC bad kila khang ia baroh ki khyrdop ban rung shapoh ka skulbah. Kim shym la ai ia kano kano ka notis da ka jingthoh shaphang ka jingshah thngan. Nga la pyntip sha ki bor kiba dei khmih shaphang katei ka jingiakhih, kynthup ia ka DC bad SP, ryngkat bad ia ka DGP bad u Chief Secretary ka jylla bad nga la pan ia ka jingiarap na ki ban pynthikna ba kan don ka jingshngain hapoh ka skulbah NEHU”.

“Watla kitei ki ar tylli ki kynhun kila ktahkti bad byrngem ia nga haka jingwan thombor ia ka iingsha ka jong nga. Namar ka jingjia kaba la kdew haneng bad ka jingthud kaba la pynmih da kitei ki ar tylli ki kynhun, ki kam ki jam ha ka skulbah kila sangeh bad sahkut lut. Ki nongtrei jong ka skulbah kila shah pynsangeh ban pyndep ïa ki kamram ka jongki bad kila sheptieng bad kim sngewshngain hapoh ka skulbah” ula bynrap.

Katkum ka jingong ka jongu, ka jinglong jingman jong ka jingsheptieng bad ka jingpynthud kala ktah jur iaka jingtreikam jong ka skulbah.

Ka NEHUSU, NEHUTA, NEHUNSA bad KSU kila dawa ba dei ban weng noh mardor ia u. Kila pynpaw ia katei hakhmat jongka Committee jongki Arngut kaba la thung da ka Ministry of Education ba ka jingwanphai biang ka jongu Prof Shukla kan long kaei kaei kaba kin ym lah ban pdiang.