Shillong, Naiwieng 28: Ka Indian Red Cross Society (IRCS), Meghalaya State Branch, hynne ka sngi Palei kala pynlong ia ka Annual General Meeting ha Raj Bhavan, Shillong ha kaba la thung syndon ia u Lat ka jylla u C.H. Vijayashankar, kum u President ka IRCS Meghalaya State Branch.
Ha kane ka jingialang la wanrah ia ka Annual Report ne ka kiphod treikam jong u snem 2023-24, ha kaba la pynpaw ia ka jingseisoh ha ka jingpyntreikam ia ki kam kiba kongsan da ka Society ha ka snem kaba la dep.
Ha ka Annual Report la batai bniah ia ki kam kiba la leh da ka IRCS Meghalaya State Branch na ka bynta ban ai jingiarap bad jingkyrshan ia ki para briew, ban kyntiew ia ka koit ka khiah bad ban pynlong ia ka Disaster Relief & Preparedness Program.
Ka IRCS kala pynpaw ruh ia ka jingtyrwa haka jingialang ban tei ia ka building kaba thymmai ban lah ban pyniar bad pynjanai ia ka rukom treikam ka jongka bad ha kane ka jingtyrwa la pynpaw ia ka jingthmu ban pynkhlain ia ka Society khnang ba kan lah ban ai ka jingshakri bad jingkyrshan na ka bynta ban ai jingshakri ia kito kiba mad ia ki jingeh haka jylla Meghalaya.
Haba kren ha ka jingialang u Lat ka jylla ula iaroh ia ka IRCS Meghalaya State Branch kaba la aiti ha ka jingshakri ia ka imlang sahlang.
Ula banjur ia ka jingkongsan ban pynkhlain ia ka Red Cross ban iakhun ia ki jingeh kiba mih thymmai ha kaba iadei bad ka jingwan lynshop ki bor mariang, ka koit ka khiah bad na ka bynta ka bha ka miat ha ka imlang sahlang.
Ha kane ka jingialang la wan ban iashimbynta da ki dkhot jongka IRCS Executive Committee, ki Staff bad Volunteers, kiba la pynpaw ia ka jingskhem jingmut ka jongki ha kaban bteng ban pynneh ia ka nam jong ka Society ban trei bad shakri khlem shongthait ha ka jylla Meghalaya.
