Shillong, Naiwieng 19 : U Myntri ka Tnad Pule Puthi Rakkam A Sangma ha ka sngi Ba-ar, ula ong ba ka Sorkar kala pyrshang kat kaba lah ban wan rah ia ki lad ki lynti ha kaban leh eiei ia ki jingeh jong ki nonghikai bapher bapher kynthup ki nonghikai SSA hapoh ka Jylla.
Haba iakren bad ki nongthoh khubor, u Rakkam ula ong “Ka kam ka dei kaba shimpor…hynrei ka Sorkar kala pyrshang kat kaba don ki lad ki lynti ban leh eiei na ka bynta ki nonghikai bapher bapher naba ki dei ki briew jong ngi bad ki dei kiba shakri ia ka Jylla”.
Ula ban jur ruh ia ka jingdonkam ia baroh ki kynhun bapher bapher kynthup ki Nonghikai ba kin iatreilang bad ka Sorkar.
Ha ka sngi Nyngong, ka Meghalaya SSA Schools’ Association (MSSASA) kala tyrwa ia ka jingdonkam ia ka Sorkar Jylla ban ai bhah ba 70% ia ki nonghikai SSA ha ka jingthungkam nonghikai ha ki kam ba lait jong ki skul bapher bapher.
Halor kane, u Myntri ula ong ba kane ka dei ka kam ba iadei bad ka policy bad ka Sorkar kala dep ban mynjur ha kaban pynjynsur ia ka rta thep kami a ki nonghikai SSA sha ka 45 snem khnang ba kin lah ban aplai kam hikai ha ki skul Sorkar.
