Shillong, Naiwieng 19 : U Chief Secretary ka Jylla Bah DP Wahlang hynne ka sngi Ba-ar, ula leit iakynduh ia ki samla pule ba iakhih ha NEHU bad kyntu ba kin pynsangeh shuwa shipor (sospon) ia ka jingiakhih katba dang iaid ka jingtohkit ka Inquiry Committee.
Ia u Chief Secretary la synran da ka Director General of Police (DGP) ka Jylla Kong Idashisha Nongrang lem bad ka Deputy Commissioner ka East Khasi Hills kong RM Kurbah.
Ki samla pule ka NEHU hapoh ka lama jong ka NEHU Students Union (NEHUSU) bad KSU-NEHU Unit, kila shah shah tngan khlem pud mynta la 15, ban dawa hiar shuki ia u Vice Chancellor Prof PS Shukla bad ban weng kam mardor ia u Registrar bad Deputy Registrar.
Wat hapdeng ka jingthung ka Ministry of Education ia ka Inquiry Committee ki arngut ki Dkhot, ban tohkit ia ki jing kynnoh pyniaid kam bakla bad jingbym lah treikam ki bor pyniaid ka NEHU, ki samla pule kila pynbteng ia ka jingiakhih halor ka nongrim ba dei ban weng kam shuwa ia u Vice Chancellor Prof PS Shukla.
U Vice Chancellor In-Charge ka NEHU Prof N Saha ula pyntip ba ula thung ia ka Inquiry Committee ka ban tohkit ia ki jing kynnoh bad ia ka kaiphod jong kane ka Committee yn sa aiti sha ka Inquiry Committee ba thung da ka Ministry.
“Ngi wan hangne tang halor kawei ka jingthmu bad kata ka long ban kyrpad ia ki samla pule ba kin pynsangeh shuwa shipor ia ka jingiakhih katbym pat dep ka jingtohkit” ong u Bah DP Wahlang haba iakren bad ki lad pathai khubor.
“Nga la iakren bad baroh ki seng ba don bynta bad nga la iathuh ha ki ia ki daw balei ba ki dei ban pynsangeh shuwa ia ki jingiakhih” ula bynrap.
U Chief Secretary ula pynpaw ia ka jingsngewskhem bad ka jingkyrmen ba ki samla pule kin sa iashong lang bad baroh ki seng kiba pynlong ia ka jingiakhih bad ba kin pynsangeh shuwa shipor ia ka jingiakhih ha kane ka por ba dang iaid ka jingtohkit.
 ka Jylla Kong Idashisha Nongrang lem bad ka Deputy Commissioner ka East Khasi Hills kong RM Kurbah.){kind=link}