Poi hospital sa 4 ngut ki samla pule ba shah thngan
Shillong, Naiwieng 08 : Katba ka jingshah thngan ki samla pule kala jam sha ka sngi kaba saw, u Vice Chancellor ka North Eastern Hill University (NEHU) Prof PS Shukla ha ka sngi Thohdieng, ula khot ia ka jingialang ba kyrkieh jong ka Executive Council ban iakren halor ki jingdaw bala buh hakhmat da ka North Eastern Hill University Students’ Union (NEHUSU).
Ia kane ka jingialang la pynlong kum ka jingpyrshang ban pynbeit noh ia ki jingdawa jong ka NEHUSU, ba kynthup ia ka jingwengkam noh ia u Resgistrar bad Deputy Registrar lem bad ka jingthung ia ki Pro Vice Chancellor ka NEHU ha Shillong bad Tura Campus.
Hynrei, namar ka jingpynthut na ka jingiakhih ki samla pule, u VC u khlem lah satia ban pynlong ia kane ka jingialang jong ka Executive Council. Kane kala khanglad ia ki bor pyniaid ka University ban pyniaid shakhmat ia ka kam ba dei bad ka jingpynbeit ia ki jingdawa ki samla pule.
Namar kata, u VC ula kyrpad ia baroh ki samla pule ba kin wan sha ka miej jingiakren ha kaban iapynbeit noh ia ki jingdawa jong ki.
Ka NEHU kala shah khang dam hadien ka jingiakhih jong ki samla pule bala ialam da ka NEHUSU bad ba la kyrshan da ka KSU-NEHU Unit ha kine ki saw sngi bala leit noh ban pyrshah ia ka jingbym lah jong u VC ban weng kam ia u Registrar bad Deputy Registrar, ia kaba la kynnoh ba ka jingthungkam ia ki ka dei kaba long beain.
Haba pynpaw ia ka jingsngewkhia ia ka bha ka miat ki samla pule, u Prof Shuka ula ong “Nga la pyrshang ban iakren mar khmat bad ki samla ban pynbeit ia kine ki kam (jingdawa) bad kyrpad ruh ban sangeh noh ia ka jingshah thngan. Nga da sngewkhia jur halor ka jingktah ia ka koit ka khiah jong ki. Hynrei, la kyntu ia ki da ki Magistrate ba ngan kiar na ka jing leit sha ki jaka ba don ki samla pule namar ka jingbym shngain”.
U Vice Chancellor ula pynpaw biang ia ka jingkut jingmut jong u ban leh eiei halor ki jingdawa jong ki samla pule bad kyrmen skhem ba ka jingiakren kan sa don biang kham kloi kat kaba lah.
Ia mynta, kila nang bun ki samla pule ba iashim bynta ha ka jingshah thngan, kiba la poi sha hospital.
Sa saw ngut ki samla pule kila poi hospital ha ka sngi Thohdieng, hadien ba ka jingshong shah thngan kala jam palat ia ka 78 kynta. La pynkit mar mar ia ki sha Shillong Civil Hospital. Hynnin ka sngi, lai ngut kila shah kit sha Hospital ha kaba arngut napdeng jong ki, kila ioh ban leit phai noh sha Iing.
Baroh lang, haduh 19 ngut ki samla pule kynthup ki nongialam ka NEHUSU bad KSU kila iashimbynta ha ka jingshah thngan.
