Tura, Naiwieng 08 : Ki Pulit ka West Garo Hills, kila kem ia laingut ki riew runar kiba dei jong ka kynhun Nongrahbor bad ioh kurup ia kawei ka pistol bad ka dagger.
Ia kane ka kynhun la ioh ban kem ha ka sngi Palei na ka thain Dadenggre.
Ki Pulit kila iohkem ia kane ka kynhun ha ka por ba iaid pahara hajan ka shnong Chibonggre. Ia kane ka kynhun la ioh kem na kawei ka maruti Alto.
Ki Pulit kila bat ia kane ka maruti Alto ba wan mar pyrshah ban talasi hynrei kane ka kali mar syn iohi ia ki Pulit, kala sangeh bad pyrshang ban phai noh. Namar ka jingkhim ka surok, kane ka kali ka khlem lah satia ban phai bad kala sahkut beit skhak ha katei ka jaka.
Uwei na ki briew ba don hapoh ula ioh kynthih bad phet krad hapdeng ka jingdum jong ka miet katba ki laingut kiba shah kem, kila sahkut hapoh.
Kane ka Alto ka dei kaba don u nombor AS18-K-6601 bad ha ka jingtalasi ia ka kali, kila ioh kurup ia kawei ka pistol 7.65 mm bala buhrieh hapoh ka dashboard jong ka kali lem bad kawei ka wait khukri.
Kine ki laingut ki kyrteng u Hemjit Rabha (32) na shnong Khardang,Assam, Assam, u Lakingsbirth Marak (30) na Anogre, bad Rikkam D. Sangma(27) na Kama Dorenggre, Garo Hills.
