Shillong, Naiwieng 08 : Ka Hima Sohra kala tyrwa ban ai jaka sha ka Sorkar Jylla na ka bynta ban shna ia ka Kad Liengsuin kaba biang pura nadong hadong napoh ka UDAAN scheme ka Sorkar India.
Kane ka jingtyrwa kala wan na u Syiem ka Hima Sohra Paiem Freeman Sing Syiem ha ka jingiakynduh ia u Lat ka Jylla ha ka sngi Tgohdieng.
Ka UDAAN Scheme ka dei ka skhim kaba thmu ban pynkhlain ia ki lad pyniasoh na suin ha ka thain bad ban air uh ia ka lad shong liengsuin kaba tad dor sha ki jaka kiba kyndong, kaba iaid ruh kat kum ka thong jong ka Jylla ban kyntien ia ki jingtei bad ka kam jngohkai.
Ka jingtyrwa sngewbha jong u Syiem ia ka jaka ka phalang ia ka jingaiti met bad mynsien jong ki Nongialam trai shnong ban noh synniang sha ka roi ka par jong ka Jylla Meghalaya.
U Lat ula pynpaw ia ka jingsngewnguh ia ka sienjam bala shim da u Syiem bad kren ia ka jingkongsan kum kine ki project ban kyntiew ia ka ooh ka kot ka Jylla bad ruh ki lad pyniasoh.
Ula kular ia u Syiem ba ia kane ka jingtyrwa un sa phah sha ki bor ba dei khmih ba kin shim rai.
Kanae ka jingtyrwa kan dei ka sienjam ba kongsan ha kaban pynkhlain ia ki lad pyniasoh ia ka thain bad ban kyntiew ia ki kam jngohkai ha ka thain Sohra, kaba nang kyrshan shuh shuh ia ka thong jong ka Jylla ban kiew ha ka roi ka par.
