Kyrpad ki Nonghikai ka NEHU ia u Lat ban lah pynkut noh ia ka kynrum kynram ha NEHU

Shillong, Naiwieng 08: Ki nonghikai hapoh ka lama jong ka North Eastern Hill University Teachers’ Association (NEHUTA) bad Meghalaya Tribal Teachers’ Association (MeTTA) hynne ka sngi Thohdieng kila leit iakynduh ia u Lat ka jylla u CH Vijayashankar uba long u Chief Rector ka NEHU, ban pynkut noh ia ka jingling jingman ha katei ka skulbah bad ban wanrah biang ia ka shongsuk shongsain.

Kane ka jingleit iakynduh kadei hadien ba la khangdam ia katei ka skulbah hadien ka jingiaid shakhmat jong ka jingshah thngan ki samla pule hapoh ka lama jong ka North Eastern Hill University Students’ Union (NEHUSU) bad ka jingioh jingkyrshan na ka Khasi Students’ Union (KSU – NEHU Unit) kiba ieng pyrshah ia ka jingpulom jong u Vice Chancellor u Prof PS Shukla ban wengkam ia u Registrar bad Deputy Registrar, ia kaba la kynnoh ba ka jingthungkam ia ki ka long kaba be-aiñ.

Haba iakren bad ki nongthoh khubor hadien ka jingwan iakynduh ia u Lat ka jylla, u President ka NEHUTA u Prof Lakhon Pakma ula ong, “Ngi lah iakren sani bha halor ki mat kiba la rah da ka NEHUSU bad KSU-NEHU Unit bad kumjuh jong ka kynhun ki nonghikai. Ngim shym la poi sha kano kano ka jinglah bna pynbeit ia katei hynrei ngi sngewnguh pat ia kaj ingsngewkhia jong u Lat ka jylla kum u Chief Rector ka NEHU bad ula pynthikna ia ngi bay n sa shim ia baroh ki sienjam kiba donkam na ka bynta ban wanrah biang iaka shongsuk shongshngain ha ka skulbah”.

“U (Lat) ula kyntu ia ngi ban ai ia ki jingai jingmut ban pynkut noh ia katei ka jingiakhih. Kumta ngin leit phai biang ban ia shong pyrkhat bad ki nonghikai bad kumjuh bad ka NEHUSU kaba ialam ia katei ka jingiakhih hashwa ban gin leit iakynduh biang ia u Lat ka jylla” ula ong bad ka bynrap, “Ngin sa ai ia ki jingai jingmut kiba kongsan na ka bynta ka bha ka miat bad ban pynbeit noh ia katei ka kam. Ula pynthikna ia ngi kum u Chief Rector bay n sa leh ia kaba donkam. Ka jingsngewkhia ka jongu kadei ba ki khynnah kim dei ban shah thngan kaba kum katei bad ka skulbah ka dei na ka bynta ka jongki bad lada kim don hangtei, yn ym don briew mano manor uh. U VC ula ban wan bad leit, ki nonghikai bad ki bym hikai ruh ki lah ban wan bad leit hynrei ka skulbah kan neh beit bad kadei ban long na ka bynta ki samla pule”.

Ula ong ba ki nonghikai ki sngewkhia jur ia ka koit ka khiah jong ki samla pule namar ba kila shong shah thngan mynta lapalat 4 sngi.

“U (Lat) ula ieh ha ngi ba ngin ai ia ki jingai jingmut kumno ban pynkut noh ia katei ka jingshah thngan khnang ba ki khynnah kin ioh ban leit phai biang sha ki karma klas ki jongki bad ha ka juh ka por ban peit ia ki lad kiba shipor bad ia ki lad kiban neh junom. Ula pynthikna ban iakren bad baroh kiba don bynta kynthup ia ki samla pule” ula bynrap.
U Prof Kma, ula ong pat ba ki samla pule ki iengskhem ha ka nongrim ka jongki bad ka long ruh kaba dei.

Ula kynthoh ruh ia ka rukom leh jongu Vice Chancellor da kaba ong “Ngi tip kumno ki samla pule kila dawa ba dei ban wengkam ia u Registrar bad Deputy Registrar bad mynta kila dawa ba u VC ruh u dei ban hiar shuki noh namar ba kila shah thngan mynta la palat ia ka 48 kynta bad ym shim la leh eiei. La kumno kumno ruh ula dei ban pyni iaka jingsngewkhia ia ka jingling jingman jong ki samla pule”.

“Mynta phi dei u khlieh jong ka jaka pule bad hapoh jong phi, hakhmat ka ophis treikam jong phi, ki khynnah kila shong shah thngan. Haba kila pynpaw ia ka jingbym hun ka jongki, ula dei ban shimkhia mardor da kaba leh da ka kam. Ym lah ban ong ba ki briew kila shah thngan bad ba phin ym leh eiei. Kane kadei ka jingeh. Balei une u VC ula don hapdeng ka jingeh kadei namar ba u long beit kumtei bad ym ju khmih bniah ia ka jingling jingman. Lada uno uno u don ia ka jingsngewthuh bad mardor haba ki briew kila pynlong ia ka jingiakhih ula dei ban leh eiei kaba dei tam na ka bynta ban shimkhia ia ka jingdawa jong ki samla pule” ula ong.

Nalor kane, u President ka NEHUTA ula ong ba ka jingkynnoh pyrshah ia u Registrar bad Deputy Registrar kim dei satia kiba khlem don nongrim.

“Baroh ngi tip kum ki nonghikai bad ngi dei tang ki nongpeit pyrman man la ka sngi bad ngi tip bha ia ki kam kiba la leh da u Registrar bad Deputy Registrar. Kim long kiba bit bad kam don satia kano kano ka jingartatien. Kim lah ban trei ia ka kam hynrei ym shim la leh eiei ban shimkhia ia ka jingsngewkhia jong ki nonghikai bad ki samla pule. Kumta, lada nga ruh nga ialam ia katei ka jingiakhih, ngan leh lang hi kumjuh” ula bynrap.