Nongstoiñ, Nailar 22: Ki Nongshongshnong jong ki Shnong Khappud ka West Khasi Hills kila pynpaw ia ka jingangnud bad duwai ba lano baka Sorkar Jylla kan phaikhmat lem noh sha ki jingeh jong ki Nongshongshnong kiba donkam ia shibun ki jingiarap kiba dei ka hok ban ioh kum ki Nongshongshnong ka Jylla.
Kane ka sur kala mih na ki Nongshongshnong ka Thain Mawiamsyiem kaba hap hapoh ka Hima Nongmynsong, kaba haduh mynta kam pat don satia ia ki lad pyniasoh kiba bit ba biang, ka ban pynsuk ia ka leit ka wan, ka kit ka bah, ka khaii ka pateng bad kiwei kiwei ki jingdonkam.
Kane ka thain ka dei kaba shongshnong bun eh da ki Nongrep bad ka dei ruh kaba lah ban pynmih bha ia ki marrep ba bun jait hynrei namar ka jingbym biang ki lad pyniasoh kum ka surok kaba biang, kine ki nongrep ha kaba bun ki khep kila hap shu bret kai ia ki marrep namar ka jinglap ba pyut noh naka daw ba kim lah shuh ban kit da ka met ban pynpoi ia ki sha ki Iew ki Hat.
Ka por lyiur ka dei ka aiom kaba tasam tam ia ki nongshongshnong namar wat ki kali kiba ju leit sha ki Shnong ka thain, kim lait satia na ka jingngam jong ka surok ktieh ha kaba bunsien la hap ban pyndonkam da ki hati ban khynniat ia ki kali ba kin lait na ka jingsahkut.
U bah Patstar Nongshlong, sordar ka shnong Mawïamsyiem u la pynpaw ïa ka jingsngew bynñiaw, namar ba ka sorkar Meghalaya kam shym la phaikhmat lem sha ki jingeh jong ki paidbah kiba don ha kitei ki bynta khappud. U la ïathuh ba kumba long mynta ki don palat 10 tylli ki shnong kiba don ha ka thaiñ Mawïamsyiem, ki bym shym pat la ïoh pdiang satia wat tang khyndiat ruh ka jingïarap na ka sorkar jylla.
“Ha Mawïamsyiem, ka sorkar kam pat pyllait wat tang ïa ka khanasumari kaba la dep ban lum naduh kham mynshwa. Kane ka la ktah bad pynduhnong shisha ïa ka shnong ka thaw, namar haduh mynta ngim pat ïoh pdiang wat tang u khaw rashon ne kiwei kiwei ki lad jingïarap na ka sorkar” ula ong.
“Ka thain kam pat ju ioh ia ki skhim kyrpang jong ka Sorkar Pdeng la ka dei ka skhim ia kiba duk, ka MGNREGA, PMAY, PMGSY, bad kiwei kiwei ki kam pynroi ka ba la pynlong ïa ka thaiñ ban shong sah ha ka jingdum” ula bynrap
Namar kata u la buh jingkylli ïa ka sorkar ba shaei ka buh ïa kita ki scheme border Road, ki scheme PMGSY bad kiwei kiwei kiba dei hok ban pynïoh sha ki jaka nongkyndong bad jaka khappud.
Kat kum ka jingong jong u, ka jylla Assam ka la pyrshang katba lah ban theh ïa ki lad jingïarap wat sha kito ki jaka ba dang hap ha u pud jong ka jylla Meghalaya bad ki la don ki nongshong shnong kiba la kham sngew jan ïa ka Assam, namar ka kham leh bha.
“Namar kata, nga kyntu jur ïa ka sorkar bad kumjuh ïa ki nongmihkhmat ba kin shimkhia ban peit lem ïa ka khia ka shon ki paidbah kiba don ha kitei ki bynta khappud, khnang ba kin ïoh ban im lem kumba long kiwei pat” ula ong.
Shuh shuh, u la pynpaw ruh ba ki nongsynshar shnong jong ka thaiñ, kila dawa ïa ka sorkar khamtam ïa ki nongmihkhmat ba kin pynïoh noh ïa ka surok ban pynïasoh naduh Noapara-Mawïamsyiem-Umthli shaduh Kyrshai, khnang ba ki phew tylli ki shnong kiba don ha katei ka don ka thaiñ, kin ïoh noh ïa kaei kaba ki la angnud baroh shikatta na ka bynta ba kan kham pynsuk ïa ka kit ka bah bad ïa ka ïaid ka ieng.
