Shillong, Naiwieng 05: Ka Shillong Lajong FC kaba long kawei na ki kynhun ialehkai Football ba paw ha ka ri, kala sdang ia ka Club Membership Program na ka bynta ki nongkyrshan ha ka I-League Season 2024-25.
Kane ka jingthmu kadei kaba la pynwandur ban wanrah ia ka jingiajan bad ki nongkyrshan ban ioh ia ki jingmyntoi bad ban ioh don bynta bad ka Club.
Ia ka I-League 2024-25 kaba la pynlong da ka All India Football Federation kan sdang naduh ka 22 tarik u Naiwieng 2024.
Ka Shillong Lajong Membership Program kadei da ka thong ban ithuh bad ban ai khusnam ia ki nongkyrshan jong ka Club ha kaba ki dkhot kin ioh ia kiba bun ki jingmyntoi, kaba kynthup ban ioh ia ki tiket, ki jain bad ki tiar ki tar jong ka club bad ka jingioh haka dor kaba duna ia ki tiket I-League ha Shillong.
Ki jingmyntoi kiba lah ban ioh lyngba ka Club Membership Program ki kynthup ia ka Gold Membership Card – 3500 ha kaba yn ioh iaka Official Jersey, Scarve, Cap & Keychain bad ia baroh ki Ticket jong ka jingiakhun ha ka I-league bad ka 50% Discount ne jingpynduna iaka dor, ha kano kano ka kyrdan ba thied ia ka tiket ha kawei ka jingiakhun.
Silver Membership Card – 2500 yn ioh ia ka Replica Jersey, Scarve & Keychain ki Ticket I-league bad 50% Discount ia ki ticket kiba na ka dor 150-300 (tang kawei ka jingiakhun).
Bronze Membership Card – 1500 yn ioh ia ka Replica Jersey, Scarve & Keychain bad ki Ticket ha man la ki jingiakhun ia ka I-league, 50% Discount ia ki tiket kiba ha ka dor 150-200 (tang ha kawei ka jingiakhun).
Ki nongkyrshan ki lah ban pyniaosh ialade bad ka Shillong Lajong FC Membership Program lyngba ka official club Social Mediapage ha ka Instagram bad Facebook. Nalor kane ki nongkyrshan ki lah ruh ban leit ha ka ophis treikam jongka Club kaba don ha Hotel Centre Point, Police Bazaar, Shillong.
