Shillong, Risaw 28: Ka Laitkor SC kala pynrem ia ka Sawmer SC da 2-0 ha ka jingiakhun ia ka OC Blue Shillong Premier League 2024 hakhmat jong ki spah ngut ki nongpeitkai kiba la wan ban sakhi ia kane ka jingialehkai Football ha SSA Stadium, First Ground, Polo hynne ka sngi Nyngkong.
U Risuk Malngiang ula thep ia ka kol ha ka minit kaba 32 bad u Fridison Wanniang ula thep ia ka kol ha ka minit kaba 90’+3 hashwa ban kut noh ka jingialehkai kaba la pynlong syndon ia ka Laitkor ban don ha ka kyrdan kaba 3 jong ka SPL.
Mar ia sdang hi ka jingialehkai kine baroh ar tylli ki kynhun kila ioh ia ka lad ban thep kol hynrei kala shim por ia ka Laitkor shiteng kynta ban ioh ban thep ia ka kol lyngba ka Penalty namar ka jingktah ia ka bol da ka kti. U Risuk ula mih ban leit shut ia katei ka penalty hynrei u nongap kol ka Sawmer u Pyrshangbanbha Dkhar ula ioh ban iada ia katei ka bol ban rung shapoh kol hynrei katei ka bol kala poi biang sha u Risuk ha kaba ula ban thep ia katei ka bol shapoh kol khlem ka jingbakla biang.
Ka Laitkor kala ioh bun ki kabu ha ka kylla miet hynrei kam shym la lah satia ban thep kol hynrei shwa ban kut noh ka jingiakhun u Fridison ula shut jam bha ia ka bol bad kala leit rung shapoh kol ia kaba u nongap kol ym shim la lah ban leh eiei.
Ka Laitkor mynta kala kamai 6 point bad kala ia ryngkat bad ka Shillong Lajong FC bad Mawlai SC kaba la wan baar hynrei kine ki kynhun kila wan shakhmat namar ka jingioh thep bun kol.
Ha ka sngi Baar ka jingiakhun kan long hapdeng ka Langsning FC pyrshah ia ka Nangkiew Irat ha ka por 5:30 janmiet.
