Shillong, Risaw 26 : U Myntri kam jngai Bah Paul Lyngdoh ha ka sngi Saitjain, ula plie paidbah ia ka jaka jngohkai-ka Tuber Chohchrieh Khliehpynthor View Point, kaba don ha ka shnong Chohchrieh, East Jaintia Hills District.
Kane ka jaka jngohkai ka dei kaba lah ban iohi ia ka Pynthor Myntdu jong ka Ri-lum Jaintia bad la tei ia ka ha ka jingpynlut kaba kot 20.33 lak tyngka lyngba ka skhim MGNREGA.
Ia kane ka jaka jngohkai la plie ha ka jingiadonlang u MLA bad Myntri ka tnad Excise Bah Kyrmen Shylla uba la ai ka jingiaroh ia ka VEC ba kala tei ia kane ka jaka tang hapoh ka shisnem.
U Bah Paul ula pynpaw ba kane ka jaka ka lah ban dei kawei na ki jaka jngohkai ba khring bha ia ki nongshangkai bad kular ban ai ia baroh ki jingiarap ba donkam na ka Tnad Tourism.
U Myntri ula ai jingmynjur ruh ia ka jingtyrwa jong ka shnong ban shna ia u Zipline hapoh ka thain.
