Shillong, Risaw 25 : U Symbud Myntri Rangbah ba khmih ia ka Tnad Transport Bah Sniawbhalang Dhar ha ka sngi Thohdieng, ula ong ba ka Sorkar Jylla kam pat shym la rai kut satia ban pynsangeh ia ka jingtywa pyntreikam ia ka project lynti rel hapoh ka Jylla.
Haba iakren bad ki nongthoh khubor, u Bah Sniawbha ula ong “Ngim pat rai pynsangeh. Ngin dang ban shim ia ka rai namar haba nyngkong, ngin pyrshang ban ioh ia ka jingmynjur jong baroh ki kynhun bapher bapher”.
“Tad ynda ngi la ioh ia ka jingmynjur jong baroh, ngin sa shim ia ka rai kum ka Sorkar” ula bynrap.
Dang shen, ka Meghalaya Tourism Development Forum (MTDF) kala ban jur ia ka jingdonkam ia ka Sorkar Jylla ban wanrah ia ka policy ha kaban kyntiew ia ki kam jngohkai ha Jylla haba kyrpad ruh ia ka Sorkar Pdeng ban mynjur ha ka ban wanrah ia ka High Speed Luxury Rail Network, ban pynduna ia ka por leit por wan na Guwahati sha Shillong.
Haba kylli ia ka jingthmu ban don ia ka Luxury Rail Network , u Bah Sniawbha ula ong ba kane ka jingtyrwa ( jong ka MTDF) ka dei kaba biang.
“Hynrei kine ki kam ki hap hapoh ka tnad Tourism. Lehse nga hap ban pan ia ki jingtip na ka Tnad Tourism ia kaei kaba la iakren ia mynta naba kam dei hapoh ka Tnad jong nga, ka dei ka Tnad Tourism” ula bynrap.
