Shillong, Risaw 24: U Myntri ka tnad Social Welfare Bah Paul Lyngdoh hynne ka sngi Palei, ula ong ba ki sengbhalang ki long laitluid ban pyni iaka jingpyrshah ka jongki katba kim pat tam ia u pud ba pynkheiñ ia ka aiñ.
“Ngim don ia kano kano ka jingwit. Ngam don ia kano kano jingeh ne jingwit lada ki jingleh jong ki sengbhalang kim pat tam ia u pud u sam jong ka aiñ” ong u Bah Paul Lyngdoh haba iakren bad ki nongpathai khubor.
Katei ka jingkren jongu kadei hadien ba ka Hynniewtrep Youth Council (HYC) kala shim ia ka rai ban pynlong ia ka jingiaid paidbah ban tur sha Secretariat ha ka 8 tarik u Naiwieng, ban pyrshah ia ka sorkar jylla halor ka jingbym lah ban pyntreikam ia ki 7 tylli ki mat jingdawa ban iakhun pyrshah ia ka jingjyllei u droks ha ka jylla.
“Sa shisien nga ban biang ba ki sengbhalang ki long laitluid ban pyni ia ka jingpyrshah ka jongki ne ia ka jingbym sngewhun tangba kim dei pat ban tam ia ki kyndon aiñ” ong u Bah Paul.
Haba pynpaw ia ka jingdonkam ban pynthymmai ia ka tnad pulit na ka bynta ban lah ban treikam bha bad ban pynkup bor shuh shuh ia ki, u Bah Paul Lyngdoh ula ong, “Kawei na kitei kadei ka ANTF, ia kaba nga don katto katne ki jingmut ban pynsngew ha u Symbud Myntri Rangbah ka jylla uba khmih ia ka kam pohiing”.
Ula kdew ba kawei pat kaba kham kongsan jong kane ka jingiatai kadei ka jingkhaii ia u drok bad ki jingdih kiba sniew ka long kaba sngewkhia bha bad ka long kaba eh ia nga kum u myntri sorkar ban pashat ia baroh ki jingtip ia ki paidbah.
“Ka don ka jingtrei jong kiba bun ngut kiba dei ki snar bah ha ka kam khaii droks. Ngi la iohksai ban poi sha ki ktem ki jongki, ngi donkam ban kyndang naduh tyllong bad sdang na u kynjri jong ka jingkhaii. Baroh kine kidei ki jingtip kiba kongsan bha. Kaei kaba ngi leh, ngam lah ban leit shalor tnum jong ka Secretariat ban iathuh ia ki paidbah ia kaei kaba jia bad kaei ka jingthmu ka jong ngi” ong u Myntri Sorkar haba bynrap “Kumta ia kiba shu peit kumto, ka lah ban long ia ki ba ngim shym la leh eiei hynrei nga iathuh ia phi ba u soh ula sdang paw ba ngin sa lah ban tehlakam ia kane ka kam sniew ha ka lynti kaba paka ia kaei kaba ym shim la lah ban leh ha ki snem kiba la leit”.
