Shillong, Risaw 24: U Khrawkupar Jana ula thep ia ka hat-trick ban pynthikna ba ka Mawlai SC kan pynliem da 4-1 ia ka Ryntih FC ha ka jingiakhun jongka OC Blue Shillong Premier League 2024 ha SSA Stadium, First Ground, Polo, hynne ka sngi Palei.
Hashuwa katei ka jingiakhun ka Shillong Lajong FC kala pynrem da 2-1 ia ka Rangdajied United FC.
U Khrawkupar ula thep ia ka kol ha ka minit kaba 48, 51 bad 80 bad mynta ula jam shaphrang ban iaknieh ia ka Golden Boot khamtam haka jingiakhun kaba nyngkong ruh ula ioh thep 1 kol.
Hadien kane u Donlad Diengdoh ula thep ia ka kol ha ka 89 minit naka bynta ka Mawlai katba u Allen L Nongbri ula thep ia ka kol ha ka 87 minit na ka bynta ka Ryntih lyngba ka Penalty.
Ka jingiakhun ha ka kylla step kala kut ha ka jingiakhiad hynrei dei ha ka kylla miet ba kitei ki ar kynhun kila ioh ban thep kol.
Ha ka jingiakhun hapdeng ka Shillong Lajong FC bad ka Rangdajied United FC, u
Samchaphrang Lato ula thep ia ka kol ha ka 26 minit bad u Emanbha Marbaniang ula thep ia ka kol ha ka minit kaba 80 naka bynta ka Lajong, katba u Benny V Khriam ula thep ia ka kol ha ka 54 minit na ka bynta ka Rangdajied.
Ka jingiakhun ia ka OC Blue SPL 2024 kan long biang ha ka 28 tarik u Risaw hapdeng ka Laitkor SC bad ka Sawmer SC ha ka por 5:30 janmiet.
