Aizawl, Nailar 21:Ka Indian Medical Association (IMA), Mizoram branch hynnin ka sngi Saitjain ka la pynlong da ka jingiakhih ban pynpaw pyrshah halor ka jingshah ktahkti jong uwei u para doktor ha la ka jong ka clinic da ka ba deng ia ki badge rong iong ha ki jaka treikam jong ki.
Ha ka 17 tarik mynta u bnai la sakhi ia ka video lyngba ka CCTV ha kaba la iohi ia ka briew kaba dang ktahkti bad thombor ia u doktor u ba dang don hapdeng ka kam ha la ka jong ka clinic shimet.
Ia kane ka briew la tip kyrteng kum ka Milari Chhangte, kaba dei ka khun kynthei marwei jong u Myntri Rangbah (CM) ba mynta ka Mizoram u Zoramthanga.
Ia u doktor uba la shah thombor ha katei ka khun u CM la tip kyrteng kum u doktor Zonuna (Dermatologist), uba dei u skin specialist ba pawkhmat kaba shong ba sah ha ka nongbah Aizawl, Mizoram.
Ka Mizoram Branch jong ka Indian Medical Association ka la pynrem jur halor katei ka jingshah thombor u para doktor ha la ka jong ka jaka trei.
Nalor kata ki la dawa ruh halor ka jingpyntreikam ia ka Mizoram Protection of Medical Service Personnel and Medical Service Institution (Prevention of Violence and Damage of Loss of Property Act), ia kaba la pynkhreh bad aiti sha ka sorkar kham hashwa da ka association.
Ha kawei pat ka bynta na ka liang u khun shynrang jong u CM, u Ramthansiama ula panmap mardor na ka bynta ka para jong u hadien jong katei ka jingjia, kata da kaba pynpaw ba ka para jong u la la ngat ha ka jingkhuslai jingmut hadien ba ka la ngat ha ka jingmynsaw na ki bynta jong ka shyllangmat ha ka sngi kaba hashwa bad ba kam shym la nang iohthiah namar ka jingsyier na ka jingsahdien ha ka shyllangmat bad pyrshang ban pan jingiarap na ki skin specialist bad ba kam lah shuh ban ap iala ka pali namar ka jingban khia ha ki jingmut jingpyrkhat.
Na ka liang u CM ka Mizoram, u Zoramthanga ruh u la pan map na ki paidbah bad khatam na ka bynta u doktor Zonuna bad kiba haiing hasem jong ka.
Ha la shithi ka jong u, u CM ula pynpaw ruh da kaba ong u sngewthuh ia ka jingsngewkhia bad ka jingiakhih jong ka Indian Medical Association, Mizoram Branch da kaba bynrap ba ka long kaba pdiang sngewbha.
Ha kajuh ka por ula pynpaw ka jingsngewnguh na ka bynta u doktor bad kiba haiing hasem jong u halor ka jingsngewthuh ia ka jinglong jingman bad kiba la pdiang burom ia u kumjuh ia ka kurim jong u hapoh ka iingsah ka jong ki hadien ba kila leit ban pan map ha ka sien kaba lai.
