Shillong, Nailar 21: Ka Peoples Democratic Front (PDF) hynnin ka sngi Saitjain, kala jied ia u MLA ka Sohra Bah Gavin Miguel Mylliem kum u President ba thymmai ka PDF, tang hynriew bnai ban leit sha ka elekshon MLA 2023 ha Jylla.
Ha ryngkat bad u Bah Gavin, ka PDF kala jied ruh ia u Myntri Sorkar Bah Banteidor Lyngdoh kum u Working President jong ka Central Working Committee (CWC) ba thymmai ha ka jingialang Triennial Conference ba long ha Mawkhar.
Ka PDF ka don 4 ngut ki MLA ha ka Iingdorbar Thaw Ain ba 60 ngut ki Dkhot hynrei, arngut na kine ki MLA-Bah Hamletson Dohling MLA ka Mylliem bad Bah Jason S Mawlong MLA ka Umsning- kila rai ban jah na kane ka jingialang bad ka PDF kala rai ba shen kin sa shim ia ka rai halor kane ka kam.
Haba iakren bad ki Nongthoh khubor, u Bah Gavin ula ong ba ka jingialang kala iakren kumno ban pynkhlain bad pynkhreh ia ka party sha ka elekshon MLA 2023.
“Shen ngin sa rai ia ka jingpynieng kyrtong ha ki Constituency” ula ong haba bynrap baka rai kan long kat kum ka jingdon jingkyrmen jong ki kyrtong ban jop.
Halor ka jingsuba ba arngut ki MLA ka PDF ki lah ban leit iasohnoh sha kiwei pat ki party, une u President ba thymmai ula ong baka party kala dep ban phah ia ki jingtip sha ki halor kane ka jingialang hynrei ki khlem wan iashimbynta satia. “Namar kata, ia ka jubab kaba dei hi phin sa ioh na ki” ula ong.
U ong ba u Bah Hamlet u dei u Working President bad u Bah Jason u dei u Vice President jong ka CEC kaba rim ka Party.
“Ki ju iadonlang beit ha manla ki jingialang tad haduh u bnai Jylliew hynrei hadien ka jingialang jong ka CWC ba long ha u bnai Naitung, ki khlem wan iashimbynta satia bad ia ka jingtip ne jubab phi lah ban ioh na ki” ula ong.
Haba kylli la ka party kan ai show cause ia kine ki arngut ki MLA, u Bah Gavin ula ong “Ka CWC kan sa shong jingialang ha kine ki khyndiat sngi bad nga tharai ba ngin sa shim rai ia kaei kaba dei ban leh ha kane ka jingialang ban wan”.
Ula pyntip ruh baka PDF kala dep ban pyntip ia kane sha ka Zonal Committee jong ka Mylliem bad kumjuh ruh jong ka Umsning Constituency.
“Haba iadei bad ka jingpynieng kyrtong na kine ki artylli ki Constituency, ngin sa shong ia ka jingialang jong ka Central Election Committee ha ki bnai ban wan bad ngin sa shim rai halor kane ka bynta” ula ong.
Haba kubur ba ka PDF ka dei ka party kaba rit, u Bah Gavin ula ong ba watla ka Jylla ka don ia ki party kiba heh hynrei ki don kam pat ia ka jingkyrshan jong ki party ba rit kum ka PDF ban thaw ia ka Sorkar MDA ha u snem 2018.
Haba iaroh ia ka jingtreikam ka Sorkar MDA ban pynbeit ia ka jingiakajia pud bad ka Assam, une u MLA ka Sohra ula ong “Hooid nga kwah ban iaroh ia ka sorkar MDA kaba ngi iadonlang, namar ngi la jam shakhmat. Naduh ka por ba ngi ioh iala ka Jylla, ngi lah ban iohi ha man ki elekshon, ki kyrtong ki mih sha khmat da ka thong ba ki kwah ban pynbeit ia ka jingiakajia pud”.
U ong “Ki paidbah ki kwah ban pynbeit noh ia ka jigniakajia pud bad haba kut ka sngi, kaei ka rai kaba la shim da ka sorkar, kin don beit kiba myntoi bad kiba duh jingmyntoi-tangba ka sorkar kala pyniaid shakhmat ia ka kam bad ngi khmih lynti ia u soh uba thiang”.
