Kwah u Bah Mohendro ban iakhun ia ka elekshon 2023 na ka NPP
Shillong, Nailar 20 : Haduh 3 ngut ki MLA na ki 5 ngut jong ka Congress kiba don hapdeng ka jingshah sospon, ki lah ban leit pyniasoh sha ka National Peoples Party (NPP) hashuwa ka elekshon MLA 2023.
Kine ki 3 ngut ki MLA ki dei i Nongialam ka Congress Legislature Party (CLP) kong Ampareen Lyngdoh ba mihkhmat naka East Shillong Constituency, Bah Mohendro Rapsang MLA ka West Shillong Constituency bad Bah Kimfa S Marbaniang MLA ka Rambrai Jyrngam Constituency.
Ka jingthmu pyniasoh jong I Kong Ampareen kala paw shynna na ka jingpyniasoh u kurim jong I, uba dei u MDC ka KHADC na Malki-Laitumkhrah Bah Fantin Lakadong naduh u snem bala lah.
Kumjuh ruh u Bah Kimfa S Marbaniang kala paw na ka jingleit pyniasoh NPP u MDC ka Rambrai-Jyrngam Bah Bajop Pyngrope kiba iadei shi kynum.
U Bah Mohendro Rapsang hynne ka sngi saitjain ula pynpaw da kaba shai kdar ba um pat pyniasoh satia bad kano kano ka party hynrei u kham noh ban iakhun ia ka elekshon MLA 2023 na ka ticket jong ka NPP.
U Bah Rapsang ula iathuh ba u khlem pat iakren satia bad kino kino ki Party la ka dei ka BJP ne kiwei kiwei ban leit iasoh.
“Watla kila don ki Party ka Jylla kila phone ia nga, wat ki paralok na ka UDP kila kyntu balei ba ngam pyniasoh noh bad ki. U MLA ka BJP bah A.L.Hek ruh u la long kum shibahaiing, ula phone ia nga” ong u Bah Rapsang.
Haba kylli kumno un leh ia ka jingbym sngewtynnad shuh ia ki paidbah ia ka NPP, u Bah Rapsang ula ong “Balei ban shu kdew kti tang ia ka NPP namar kane ka dei ka sorkar synrap kaba la iadonlang ka UDP, BJP bad kiwei kiwei”.
Arngut na kine ki MLA ba shah sospon ka Congress, kata u MLA ka Mawlai Bah P.T Sawkmie bad MLA ka Nongpoh Bah Mayralborn Syiem ki lah ban iasoh sha ka United Democratic Party (UDP) kaba iatreilang bad ka NPP ha kane ka sorkar MDA ba mynta.
