Shillong, Risaw 21: Ka Meghalaya kala shah pynrem noh ha ka Tripura ha ka jingiakhun iaka Ranji Trophy ha MCA Ground ha Polo hynne ka Sngi Nyngkong.
Ka Tripura kala pynrem ia ka Meghalaya da ka Innings bad 17 run.
Ka Tripura kala leit ban tied nyngkong bad kala kamai 377 run bad hap 8 wiket bad hadien kane, ka Meghalaya kala kamai 222 run bad hap lut ki nongtied bad haba ka Meghalaya kala leoit ban tied biang ha ka sien ka baar kala kamai tang 138 run bad hap lut ki nongtied bad kala pynlong syndon iaka Tripura ban jop suk ia katei ka jingialehkai cricket.
U MB Mura Singh ula ioh khur 5 wiket bad ai 44 run bad ha ka jingleit kawang bol ha ka Inning kaba nyngkong bad ula ioh 6 wiket bad ai 52 run ha ka Inning ka baar bad haba khein kyllum ula ioh khur 11 wiket bad ai 96 run bad ha ka jingleit tied ka jongu ula ioh ban kamai 60 run bad ula ioh ia ka khusnam ‘Player of the Match’.
Ki nongialehkai ka Meghalaya kim shym la lah ban shan slem ha kaba kila hap dang kloi na ka jingtbit kawang bol u Mura hynrei u Jaskirat Singh Sachdeva ula ioh ia ka Half Century, u Kishan Lyngdoh ula kamai 30 run bad u Dippu ula kamai 29 run.
Ka kynhun jongka Meghalaya kan leit mynta sha Aurangabad ha kaba kan iakhun pyrshah ia ka Maharashtra naduh ka 26 tarik u Risaw.
