Guwahati, Risaw 19 : Ka Central Bureau of Investigation (CBI) ha ka sngi Thohdieng, kala register haduh 6 tylli ki ejahar pyrshah ia ka jyrsieh khaii online ha kylleng ki jaka ka Assam.
Ia kine ki case la mudui ruh hakhmat ka Special CBI Court ba kynthup ia ka actress kaba paw bha ha Assam nalor kiwei ki briew kiba la shah pynngat lang ha kane ka jyrsieh kaba la kyndang ha baroh kawei ka Jylla.
Kine ki ejahar kiba don u nombor RC 221 2024 E 0013 sha ka RC 221 2024 E 0018, ki kynthup ia ki jingpynngat hapoh ka kyndon Banning of Unregulated Deposits Schemes Act, 2019, nalor ki kyndon ka BNS bad IPC.
Ki Pulit ka Assam kila dep aiteng teng ia ki 36 tylli ki case sha ka CBI ba kan nang tohkit shuh shuh, ia kaba 6 tylli la dep ban register mynta hapoh ka Iingkashari.
Ka khubor ba iathuh ba ka jingtohkit jong ka CBI ia kine ki briew kiba shah set mynta ha Dibrugarh District Jail, kan sa sdang naduh ka sngi Saitjain.
Ha ka 3 tarik Nailur, ki Pulit kila kem ia u nongpyniaid ia ka jyrsieh khaii online ba 22 snem-u Bishal Phukan hadien ba paw pyrthei ka jyrsieh kaba kot haduh T.2,200 klur.
Haba nyngkong, ki Pulit ka Dibrugarh, kila register ia ka suo-moto case halor kane ka jingjia bad hadien, kila ioh pdiang sa 4 tylli ki ejahar bala mudui da ki briew kiba shah thok, kiba long pyrshah ia u Phukan.
