Nongpoh, Risaw 19 : U samla Skhemlang Suba bad ka Filinza Hansapi, kila ioh rah ia ka nam lahduh ha ka jingiakop mareh bala tip kum ka ‘Fit India Swacchta Freedom Run’ ba long ha ka sngi Saitjain ha Ri-Bhoi District.
Ia kane ka jingiakop mareh la pynlong da ka Ophis u District Sports Officer ka Ri-Bhoi ha ka jingiatreilang bad ka Ophis u Deputy Commissioner.
Kane ka jingiakop mareh ba 5 Km, kala sdang na Ri Shat Sngi Orchid Resort, Umiam bad la pynkut pat ha Meghalaya State Fisheries Research & Training Institute, Mawpun Kshaid.
U MLA ka Umroi Bah Damanbait Lamare, ula kaweh ia ka lama jong kane ka jingiakop ha ka jingiadonlang u Distrist Sports Officer Bah Bobby Nongbet lem bad kiwei kiwei ki Nongtrei ka Tnad Sports & Youth Affairs.
Ki samla shynrang bad kynthei na kylleng ki shnong ka Ri-Bhoi District, kynthup ruh ki Longkmie, kila wan ban iashimbynta ha kane ka jingiakop mareh.
Na ki shynrang, u samla Skhemlang Suba, u la wan haka kyrdan kaba nyngkong, u Samla Monas Bongrung u la wan baar bad u samla Jemon Makri u la wan balai.
Ha ka thup jong ki kynthei, ka samla Filinza Hansapi ka la wan ba nyngkong, ka samla Julina Bongrung ka la wan baar bad samla Rinalis Ingti ka la wan balai, Bad ïa ka nam kiba la San haka rta naka liang ki kynthei la ïoh da i kong Edwina Nongrum.
Kine ki nongjop kila ioh rah sha iing ia ka khusnam lem bad ka song pisa.
