Shillong, Risaw 19: Ka Hynniewtrep Youth Council (HYC) kala iawer iaki paidbah nongshong shnong ka Jylla ba kin iawan sha ki jingialang paidbah ki ban long ha kylleng ki jaka sor ka Ri-lum Khasi bad Jaintia hashuwa ban pynbud da ka rally ban tur sha Secretariat haka 8 tarik Nawieng 2024.
Kane ka jingiawer paidbah ka HYC kadei naka bynta ban dawa iaka Sorkar Jylla ba kan pyntreikam iaki 7 tylli ki mat ban iakhun pyrshah iaka jingjyllei ki nongkhaii bad nongdih drok hapoh Meghalaya khamtam ha Nongbah Shillong.
Ki 7 tylli ki mat baka HYC kala dep phah sha u Myntri Rangbah ka Jylla ki kynthup: ka jaka sumar lane ka Rehabilitation, ka Free Detoxification (OST) bad Day Care Centers haki jaka ba jyllei drok, ban thaw daki Fast Track Courts/Special Courts hapoh ka NDPS Act, ban tohkit bad pynrem iaki Case hapoh NDPS (NDPS) Act 1985, ban tehlakam iaka jingkhaii drok hapoh ka Narcotic Drugs and Psychotropic Substances Act, 1988 (PIT-NDPS Act), ban pynkhlain iaki sienjam ban khanglad iaka jingwan rung drok hapoh ka Jylla bad ban wanrah daka Office jong ka tnat Narcotics Control Bureau (NCB) ha Shillong.
Haba kren shaki lad pathai khubor u President ka HYC Bah Roy Kupar Synrem u la kam ba kine ki mat jingdawa ka seng kila don lypa hapoh ka Drug Reduction Elimination and Action Mission (DREAM) ba ka Sorkar kala pynbna naduh 2023 hynrei haduh mynta, ki jingpyntreikam kim pat paw pyrthei.
Ula kynthoh baka jingkam jong ka Sorkar Jylla ba la pyntreikam iakam DREAM project hapoh ka Jylla ka long tang haka jingphoh sniew (Dream) namar haduh mynta ki kam kim pat paw satia ha madan.
U la ong ba ka Sorkar Jylla kadei ban sngewthuh shai ba ka thma pyrshah ia u drok kam dei tang ka thma jong ka HYC hynrei kadei jong baroh ki paidbah ka Jylla kiba don ka jingsngewkhia iaka bha ka miat jong ka imlang sahlang.
“Namar kane ka HYC kan pan ka jingkyrshan naki paidbah ka Jylla ban iasnohkit lang bad ka seng ha kane ka thma pyrshah ia u drok bad ban ratdyngkhong na kane ka Jylla khamtam na Nongbah Shillong” ong u Bah Roy.
U President ka HYC u la pyntip ba ka Seng hashuwa ba kan shim daka sienjam ba tyngeh ban pynbor iaka Sorkar Jylla ban pyntreikam pura iaki kyndon jong ka DREAM Project , kan pynlong shwa daki jongialang paidbah ha baroh ki jaka sor jong ki District hapoh Rilum Khasi-Jaintia.
Ka HYC kala rai ban pynlong shwa daka jingialang paidbah haka 25 tarik Risaw ha Iew Umsning, 28 tarik ha Nongstoin, 29 tarik ha Nongpoh, 30 tarik ha Iawmusiang Jowai, 31 tarik ha Iew Mawkyrwat, 1 tarik Naiwieng ha Khliehriat, 2 tarik Risaw ha Mairang bad kiwei ki jingialang ha kylleng ki shnong ka Nongbah Shillong kum ha Mawlai, Upper Shillong, Mawprem, Rynjah bad ha Mawryngkneng.
“Hadien kine ki jingialang ki ban long ha ki Nongbah District jong ka Rilum Khasi-Jaintia, ka HYC kan pynlong ruh daka Rally ba heh ha ka 8 tarik Naiwieng 2024 ha Shillong ban tur sha Secretariat” u la ong.
 kala iawer iaki paidbah nongshong shnong ka Jylla ba kin iawan sha ki jingialang paidbah ki ban long ha kylleng ki jaka sor ka Ri-lum Khasi bad Jaintia hashuwa ban pynbud da ka rally ban tur sha Secretariat haka 8 tarik Nawieng 2024.){kind=link}