Shillong, Risaw 15 : Ka Meghalaya Arm Wrestling Association (MAWA) ha ka sngi Baar kala pynbna ia ka kyrteng jong ki 19 ngut ki nongiakhun kti na Meghalaya, kynthup ia ki 9 ngut kiba don jingduna ha ka dkhot met kiban mihkhmat ia ka ri India ha ka Asian International Cup.
Kane ka jingiakob khunkti kan long ha Mumbai, Maharashtra, naduh ka 19 haduh ka 26 tarik u Risaw, 2024.
Ka jingjied ia kitei ki nongialehkai kadei ka sakhi ia ka jingtrei shitom ka jongki, ka jingai lut bad ka jingskhem ha ka nongrim. Kila pyni ia la ka sap ka phong kaba la pynlong ia ki ban ioh ia ka jaka ha ka kynhun jong ka ri India.
Napdeng kitei ki nongialehkai kiba la shah jied kidei kiba la paw lypa bad kiba dang shu paw kiba la pyni ia ka jingtbit ka jongki ha ka jingialehkai Arm Wrestling ha ka jylla Meghalaya.
Ka MAWA kala jied ruh ia u Bah Aiboklang Paul Wanniang kum u Captain bad ka Margaret Pathaw kum ka co-captain. Ka jingialam ka jongki kan long kaba kongsan ha kaban btin ia ka kynhun ha katei ka rynsan iakob. Nalor kane u Bah Terence Jones Lyngskor bad ka Kong Sumita Kshiar kila shah jied kum ki nongmihkhmat jong ka kynhun.
Kane ka kynhun kan mih ha ka 18 tarik mynta u bnai ban leit sha Mumbai.
“Ngi pynshlur ia ka imlang sahlang bad ia ki nongieid ban ialehkai ba kin buh lem ha ki jingduwai naka bynta ki nongialehkai ki jong ngi haba ki mih ban leit ban iashimbynta bad ba kin lah ban lehkai bha ha katei ka jingiakob bad ban wanphai sha iing da ka jingjop. Ka Asian International Cup kadei ka kabu ia ki ban pyni iala ka sap ka phong ha ka rynsan jong ka pyrthei, ban iakhun pyrshah ia kiba tbit ban kumjuh ban kyntiew ia ka kyrdan ialehkai Arm Wrestling ha ka ri India” la pynpaw u Information Secretary ka MAWA u Bah Hubert Lyngdoh lyngba ka kyrwoh khubor.
“Ka MAWA, ka pynpaw ruh ia ka jingsngewnguh ia u Myntri Rangbah ka jylla u Conrad K Sangma, u Myntri ka tnad Ialehkai Bah Shakliar Warjri, ka Directorate of Sports and Youth Affair bad ka Meghalaya State Olympic Association hapoh ka jingialam ua Bah John F Kharshiing, kiba la ai iaka jingkyrshan kaba radbah bad ka jingiengskhem kaba la long ka atiar ha ka jingiaid shakhmat bad ka jingmad iaka jingjop. Ngi da sngewnguh shisha ia ka jingiatreilang bad ka jingai mynsiem, kaba la ai mynsiem ia ngi ban poi sha kliar ha kaban kyntiew ia ka Sports & Youth Development ha ka imlang sahlang” ula pynkut.
