Nongstoiñ, Risaw 15: Ka Sorkar Jylla kala pynioh da ka skhim Pradhan Mantri Gram Sadak Yojana (PMGSY) ba T.551.65 klur na ka Sorkar Pdeng ban shna pynbna noh ia ka surok Mawlangsu-Phodumbah.
Kane ka surok ba jrong kumba 5.40 Km, ka dei kaba la dawa la slem bha da ki Nongsynshar Shnong ka thain bad ki kynhun Sengbhalang. Ka jingdawa ka long ruh ban shna pynbha ia ka surok haduh Rambrai kaba jrong 11 Km naduh Mawlangsu.
Ka jingmang pisa ba mynta (surok Mawlangsu-Phodumbah) ka dei tang jong ka wat kaba nyngkong katba ia ka 6 Km kaba dang sah ha Phodumbah sha Mawthungmarwei, ka Sorkar lyngba ka Ministry of Road Transport ka dang ap ia ka Jylla ban pyntip ia ka bhah ba kan sei.
U President ka FKJGP Rambrai Circle Bah Jiedstarlang Lyngkhoi ula ai khublei ia kane ka jingshimkhia jong ka Sorkar Jylla ban pynioh ia kane ka skhim, ka ban pynurlong ia ki jingangnud jong ki paidbah.
“Ka Seng na ka por sha ka pork a ju phah ia ki jingthoh ym tang sha u Executive Engineer ka PWD hynrei wat sha u Myntri Rangbah ka Jylla, ba dawa ban shimkhia bad phaikhmat lem ia ka jingeh ki paidbah ka thain namar katei ka surok. Mynta ngi la ioh ia ka jubab” ula ong.
“Ngim lah khlem da ai khublei kyrpang їa u Symbud Myntri Rangbah Bah Prestone Tynsong u ba peit їa ka tnad PWD, u ba la shimkhia bad pynioh ia ka song pisa na ka bynta katei ka surok. Ka jingshimkhia jong ka sorkar ban pynbha їa katei ka surok kan long ka jingkyrkhu kaba khraw їa ki paitbah” ula ong.
Une u nongialam ka FKJGP ula kyntu pat ia u Symbud Myntri Rangbah ban tynruh sha ka Sorkar Pdeng ba kan pyn mang pisa lem noh ia ka surok na Phodumbah sha Mawthungmarwei.
“Namar ka jingpynbha ia ka surok (haduh Mawthungmarwei), ki paidbah ka thain haba ki leit donkam sha Rambrai kaba dei ka Headquarter ka Block, ki hap ban leit iaid kyllain sha Tyllang Umliej bad hiar sha Nongstoin ban ioh leit sha Rambrai-kaba ka jingjngai kala poi kumba 58 Km eiei. Lada don surok na Phodumbah sha Rambrai, ka jingjngai ka don tang 6 Km” ula ong.
