Shillong, Risaw 14: Ki don haduh 736 tylli ki case kiba la rejistar da ka Women Helpline ka Directorate of Social Welfare ha kine ki 7 snem kiba la leit noh.
Na kitei, 279 tylli ki case kidei kiba dang iaid shakhmat bad 457 tylli ki case kidei kiba la pynkut noh. Kine ki dei naduh u snem 2017 haduh u 2024, la iathuh ki heh ophisar ka tnad hynne ka sngi nyngkong.
Mynta u snem haduh u bnai Risaw, kila don 193 tylli ki case kiba la ioh pdiang da ka Women Helpline kaba kynthup ia 60 tylli kiba dei ki kam lehbein hapoh iing, 18 tylli kiba dei ki kam sniew kiba la jia lyngba ka Online Digital, 6 tylli ki jingpynthud bad jingpynsajia ia ka bor pyrkhat pyrdain, 26 tylli kiba dei ki kam iakajia lyngba ka ain ka kanun, 7 tylli kiba iadei bad ka koit ka khiah ki kynthei, 2 tylli ki jingjia shah ktah kti, 63 tylli kiwei pat, 4 tylli ba jah ki longkmie, 4 tylli ki jingshah lehbein ha ki jaka paidbah ne jaka treikam, 1 ka jingshah kren bein, 1 ka jingshah pynkynriah bad 1 ka jingjia hapoh ka jaka treikam, kila iathuh.
Ha kawei pat ka liang, ka child helpline kala ioh pdiang 315 tylli ki case ha u snem 2024-25. Na kitei, 51 tylli ki case kidei kiba iadonbynta bad ka jingshah lehbein ki khynnah, 2 tylli ka jingpynshong kurim khynnah, ka jingshah bret jong ki 8 ngut ki khynnah, 1 ka jingpyntrei bylla khynnah, 11 ngut ka jingjah ki khynnah, la lap ia 15 ngut ki khynnah, 3 ngut kiba la ngop ha ki jingdih pynbuaid, 55 tylli ki case kidei kiba la seisoh ha ka jingiapynbeit.
Ha u 2023-24, ka jingioh pdiang ia ki case ka long 142, ha kaba 112 tylli kidei kiba la dep ban iapynbeit noh, la iathuh ki heh ophisar.
Da kaba ai khublei ia ka Directorate halor ka jinglah ban treikam bha, u Myntri Sorkar uba khmih ia ka tnad Social Welfare u Bah Paul Lyngdoh ula ong, “Kumba phi lah iohi ia ka jingshisha halor ka jingseisoh jong ka rukom treikam, lada phi peit biang ia kitei ki jingkhein kiba la pyni kan long la kumno kumno sha ka 90%. Kiba bun na kitei ki case kidei kiba la dep ban pynkut noh kaba mut ba kila poi noh sha kaba kut”.
Ula ong, ba kala don ka jingsngewthuh bad ka jingtip jong ki nongshong shnong ka Meghalaya shaphang kitei ki mat kumta la ioh pdiang bun bha ia kitei ki jingjia.
“Lada phi ianujor ia ka jinglong jingman mynta bad kiei kiba la jia 10 snem mynshwa, ka don ka jingiapher kaba heh bha namar ba kham mynshwa ki paidbah ki kwah ban shu sngap jar. Kaba bun tam kaba ki lah ban leh kadei ban leit ujor ha ki Rangbah Shnong bad ki Dorbar Shnong, ia kaba kim shym la lah ban shimkhia ia kitei ki jingjia. Mynta haba kala don bun ka jingpynsngewthuh paidbah, ki briew kila mih shakhmat bad kumta kala don ka jingkiew ha kitei ki jingjia” la ong u Bah Paul Lyngdoh.
U Myntri ula ong, “Phi lah ban iohi ia kitei ki jingkdew ha kiba bun ki jingpynsngew bad jingpynpaw kaba phi lah ban iohi Online, ka Meghalaya kadei ka jylla kaba la niew ba kadei kaba shngain ha kaba iadei bad ki longkmie bad ki khynnah. Phi lah ban lap hi dalade ba ki briew kiba wankai sha Meghalaya kila ong, haba ki leit jingleit marwei ne bad la ki khun ne tang ka kmie bad ki khun, ki leit sha kylleng ki shnong bad kim shym la shem ban don kano kano ka jingshah byrngem byrsit ne ban sngew ba kim shngain”.
