Nongstoiñ, Risaw 14: Ki paid nongshong shnong ka thaiñ Malangkona, kila dawa ia ka sorkar Jylla ba kan pynioh noh ia ka Primary Health Centre (PHC).
Kumban shu pynkynmaw ba ka Malangkona ka dei kawei na ki shnong khappud kaba hap ha Mawshynut C&RD Block. Ka Malangkona ka dei ruh ka shnong kaba la heh bad ïar bha bad ka don ruh shibun ki kyntoit shnong ba kynthup naduh Langdongdai, Mawsmai, Nonghawei, Sildubi, Amagaon, Malangkhasi, Salpara, Malangjoypur, Siminaguri bad bun kiwei kiwei pat ki shnong kiba marjan.
Katei ka thaiñ khappud ka dei kaba ka jingshit ka jur bha khamtam eh ha ka por lyiur, ha kaba ki paidbah ki ïakynduh jingeh ha kaba ïadei bad ka koit ka khiah. Ki jaka sumar kiba dei peit ïa katei ka thaiñ ki jngai bha, kumta haba ki paidbah ki shitom bad ki thmu ban leit phah sumar kum ha Aradonga PHC, Riangdo Community Health Centre (CHC), ki hap ban ïaid lyngba na Assam, namar ym pat don satia ki surom kiba biang kiba pynïasoh bad ki shnong ha katei ka thaiñ.
U Bah Jedick Sangma u Sordar jong ka shnong Huhuapara u ba long ruh uwei na ki riew rangbah katei ka thaiñ haba ïa kren bad u nongthoh khubor lyngba ka telephone, u la ong ba ka Malangkona ka dei ka jaka pdeng bha na ka bynta ki 21 tylli ki shnong kiba don ha katei ka thaiñ. Kumta ka la don kam haduh katta katta ba ka sorkar kan wanrah da ka Primary Health Centre ha katei ka shnong, khnang ba ki paidbah kin ïoh ïa ka jingsumar kaba biang ha ka por ba ki pang ki shitom.
Utei u rangbah u la ïathuh da kaba ong, “Ki paidbah na ka thaiñ jong ngi haba ki pang ki shitom, ki hap ban leit wad dawai na Boko PHC ha Assam bad lada dei ki jingpang kiba kham jur ki hap ban leit haduh Guwahati. Kumta ki shem jingeh haduh katta katta namar ka ktah ïa ka jinglut jingsep ym tang ha ka bai sumar ïa kiba nongpang hynrei ïa kiba leit ban ap ruh”.
U la ïathuh ruh, “Ka don kawei ka Primary Health Centre ha Aradonga. Hynrei naduh ba ka sorkar ka la aiti ïa katei ka jaka sumar ban pynïaid ha kawei ka Non Government Organisation (NGO), na ka liang ki nongpang bad ki paidbah kim hun satia namar kim pat dei ki Doctor kiba la tbit kum ki Doktor sorkar. Dei halor kane ka nongrim ba na ka liang ki paidbah ka thaiñ ki la sngew donkam haduh katta katta ban don noh ïa ka Primary Health Centre PHC la jong ha kane ka jaka”.
U la ong ba lada ka sorkar ka sngew synei lem ïa ki paidbah nongshong shnong katei ka thaiñ, ka la dei ban pyrkhat khia halor kane bad ban thaw ki lad ki lynti kumno ban pynurlong ïa ka jingkwah jong ki paidbah ha ka jingïadei bad ka koit ka khiah jong ki.
.){kind=link}