Shillong, Risaw 14 : Ka Nongialam ka NPP bad Myntri Sorkar Kong Ampareen Lyngdoh kala pyntip ba ka party kala pynkhreh pura ialade ban mih iakhun ia ka elekshon shiteng samoi ha Gambegre bad ki elekshon MDC ha Ri-lum Khasi bad Jaintia.
Haba iakren bad ki lad pathai khubor ha ka sngi Nyngkong, ka kong Ampareen kala ong “Ka NPP ka dei ka party, kaba ju pynkhreh bha ialade ha man ki elekshon, la ka dei ka elekshon Legislative Assembly, ka District Council ne lah ban dei ka MP..ngi dei ka party ba pynkhreh bha iala ka jong ka elekshon.”.
Haba pynpaw ba ka NPP kan iakhun tyngeh ban jop ia ka Gambegre seat, ka Myntri kala ong “Ngin iakhin ia ka elekshon shiteng samoi bad ngin pyrshang ban jop ia kane ka seat. Ngin pyrshang ban knieh noh na kiwei ki party namar ha kane ka por, ka jingskhem ha ka synshar khadar ha Meghalaya ka dei kaba donkam palat”.
“Ngin ym tip kiei ki jingiatai ki ban mih hynrei, ngi shu duwai ba ngin ym iapait iapra hapdeng jong ngut da kaba pynshong nongrim na ki Jaidbynriew, ka niam, ki kam bad kiwei kiwei” kala bynrap.
Nalor kane kala ong “Lada phi kylli ia nga ba haduh katno ka jingpynkhreh jong ngi ka long, ngi la pynkhreh 100 na ka 100. Ngam pat leit sha madan, lehse ngam pat dei ka briew ka ban ai ia ki jingsngew kiba dei halor kane ka kam hynrei kila batai ia nga ba ngi don ha ka jingiakhun ha kine ki elekshon. Wat ym khein troin ia ki jingpynkhreh jong ngi”.
Ka NPP kala pynieng ia ka kurim u Myntri Rangbah Conrad K Sangma, ka Mehtab Chandee Sangma ha kane ka elekshon shiteng samoi ha Gambegre, kaban sa pynlong namar ka jingiehnohkam u MLA Saleng A Sangma hadien ka jingjop kum u MP ka Tura.
