Shillong, Risaw 09: U Myntri Rangbah ka jylla u Conrad K Sangma, hynne ka sngi Balang ula bteng biang ban leit jurip ia ki jaka ha rilum Garo kiba la shah ktah na ka jingshlei um ha kaba ula leit jurip ia ka Chokpot Civil Sub Division ha South Garo Hills.
U Myntri Rangbah ula leit sha Reni Badimagre ban jurip ia ka jingkieng kaba don halor jong ka wah Dareng kaba pyniasoh ia ka Reni Badimagre bad ka Bibragre. Kane ka jingkieng kala shah pynkhyllem ha ka jingshlei um, hynrei ktaei ka jingshlei um kam shym la ktah pat ia ki nongshong shnong ka Reni Badimagre.
Ka Mt Carmel School hajan ka Iew Chokpot kala shah ktah na ka jingshlei um watla katei ka iingskul kam shym la shah pynjulor hynrei ki kot, ki meij, ki shuki bad kiwei kiwei kila shah pynjulor.
Ula leit ruh ban jurip ia ki iing kiba la julor ha Bibragre, Chokpot ha kaba kila don 20 tylli ki longiing kiba la shah ktah bad 9 tylli ki iing kila shah pynjulor bad la sam ruh ia ki jingiarap sha ki 20 tylli ki longiing kiba la shah ktah.
Ha ka shnong Rongrakgre u Myntri Rangbah ula iakynduh bad iakren bad ki longiing kiba la shah ktah na ka jingshlei um, ha kaba kila don 38 tylli ki longing kiba la shah ktah bad 24 tylli ki iing kila julor bad la sam iaki jingiarap sha baroh kitei ki longiing.
U Conrad ula iakren ruh bad ki nongshong shnong jongka Gonganggre bad Danggilgre ha kaba kila don 27 tylli ki longiing kila shah ktah bad 10 tylli ki iing kila julor bad la sam ruh ia ka jingiarap sha ki baroh.
Ula leit jngoh ruh ia ka iing kaba la julor ha ka shnong Daramgre ha kaba kila don 7 tylli ki longiing kiba la shah ktah bad 3 tylli ki iing kila julor bad ula leit jurip ruh ia ka madan ialehkai ha Daramgre kaba la julor na ka jingshlei um bad ula kular ban phah pynkhuid ia ka khyndew bad ka shyiap ha ka tnad PWD.
U Myntri Rangbah ula leit jurip ia ka shnong Rongrikkimgre bad ia ka jingkieng kaba la shah rong noh ha ka um kaba don halor ka wah Dareng kaba pyniasoh ia ka shnong Rongrikkimgre bad ka Dikronggre.
Ia katei ka jingkieng la tei da ka BADO la bun snem mynshwa.
