Shillong Nailar 19: U Symbud Myntri Rangbah ka jylla Bah Prestone Tynsong, u la ong ba u ka Liang Pyrshah All India Trinamool Congress (AITC) ka lah ban leit ujor shano shano ruh halor ki jingkynnoh bapher bapher pyrshah ia ka tnad Bording haba pynpaw “Ngi long kiba la pynkhreh ban ai da ka jingshai kaba paka”.
Kane ka jingkren u Bah Prestone Tynsong kadei hadien ba u Nongialam AITC bad Nongialam ka Liang Pyrshah u Dr Mukul Sangma u la phah daka jingthoh sha u Myntri Rangbahduh ka ri u Narendra Modi ba kyrpad ban phah tohkit haka SIT ne CBI halor ka jingbam sap haka jingpyndait iaki Smart Meter haka jylla.
“Ngi la dep ban thung iaka kynhun tohkit kaba la khlieh da u Nongbishar uba la shongthait bad ka sorkar kala iohpdiang ruh iaka kaiphod jingtohkit kaba la dep ruh ban sei paidbah” ula ong.
“Katkum ka jingkhmih bniah ka jong ngi, ngi lah ba kam don ki kynrum kynram, hynrei u (Dr Mukul) u long uba laitluid ban leit ujor shano shano, ka biang hi, hynrei na ka liang ka jong ngi ruh ngi lah long kiba la khreh ban ai ia ki jingshai kaba paka” ula bynrap.
U Bah Prestone la pynshai ba kam shim la don satia kano kano ka jingpyndonkam bakla ia ka skhim bad ka sorkar jylla kan sa pyllait paidbah ia kane ka kaiphod haka website khnang ba ki paidbah kin tip iaka jingshisha.
“Myn ha kane, ka HYC kala wad jingtip lyngba ka RTI bad kila ioh iaka jingshai na ki kot ki sla bala pyni kumba ki long bad na ka liang ka jong ngi ngin don eiei ban ong da kumwei pat, namar ia ki kot ki sla, ki jingiateh kular, jingkhot Tender kila don lut kumba ka long” ong u Myntri uba khmih ia ka tnad Bording.
