Shillong Nailar19: U Symbud Myntri Rangbah ka jylla Bah Prestone Tynsong, hynne ka sngi thohdieng, u la pyntip ba u Myntri Rangbah ka Meghalaya bad u Myntri Rangbah ka Assam ki lah ban iakynduh ha ka 21 tarik mynta u bnai ban iakren halor ka kam iapynbeit ia u pud u sam sa ha ki hynriew tylli ki jaka ba dang sah.
“U Myntri Rangbah ka jylla u Conrad Sangma bad u Myntri Rangbah ka Aasam u Himanta Biswa Sarma, ki lah ban iakynduh ha ka 21 tarik Nailar, ka ban long la kumno kumno hashwa ba u Myntri Rangbah ka Jylla un wanphai sha Shillong” ong u Symbud Myntri Rangbah haba iakren bad ki nongthoh khubor.
U la ong ruh ba lehse hadien ba kila leit phai sha la ka jong ka jylla, ki ar Jylla kin sa thaw iaki Regional Committee na ka bynta ka Wat ka Baar.
Lah ban ong ka sorkar Assam bad Meghalaya kila dep ban pynbeit ia u pud u sam ha ka wat kaba nyngkong na ka bynta ki 6 tylli ki jaka bad shen kin sdang ban pynbeit ia u pud u sam ha ka wat ka Baar na ka bynta ki 6 tylli ki shnong kiba dang sah.
Kum ban shu pynkynmaw, dang shen, u Conrad Sangma u la ong, ka jingiakren pynbeit pud kan long hadien ka jingrakhe iaka sngi Laitluid jongka ri bad ka jingialang kan long ha Guwahati.
U la pyntip ruh ba ki ar jylla kin sa thaw iaki Regional Committee ban pyniaid shakhmat iaka jingiakren pynbeit ia u pud jong ki 6 tylli ki jaka kiba kham jur ka jingiakajia pud bad kynthup ia ka Langpih, Block-I bad Block-II.
