Shillong Risaw 05: U Lat ka jylla Meghalaya u CH Vijayshankar hynne ka sngi Saitjain ula plie paidbah ia ka Shillong Book Fair kaba ar, kaba la pynlong da ka National Book Trust, India.
Kane ka Book Fair kaba 9 sngi kan kut ha ka 13 tarik u Risaw ha ka phyllaw jong ka State Central Library, Shillong.
U Lat ka jylla ula pynpaw iaka jingkmen ia kane ka tamasa jong ka jingai jingtip kaban long ka jingmyntoi ia ki samla ka nongbah Shillong.
Haba kren ha ka jingialang u Principal Secretary ka tnad Arts & Culture u Bah F.R.
Kharkongor, ula iaroh ia ki paidbah kiba la mih hapdeng ka jingbym ailad ka suinbneng bad kane ka jingwan iashimbynta ka jongki ka pyni ba kidei kiba kwah ia ki kot.
Ula ai khublei ia ka National Book Trust India kaba la jied iaka nongbah Shillong kum ka jaka ban pynlong iaka iew die kot ne Book Fair mynta u snem.
“Ngi kyrmen ba kane ka (Book Fair) kan iai roi na ka bor sha ka bor” ula ong.
Da kaba sot iaka jingkren u Khalil Gibran, ula kyntu ia ki samla pule ba ki kot ki iarap ia ki ba kin dang kiew shaphrang shuh shuh. “Long ki nongpule, long ki nongialam” ula pynshlur
U Yuvraj Malik, Director National Book Trust India ula ai khublei ia ka sorkar jylla bad iaka tnad pule puthi kiba la kyrshan iaka Book Fair bad ula ong ba ki kot kidei shi bynta jong kano kano ka jingiaid shakhmat jong ka jaidbynriew.
U Malik ula ong, ba ki khynnah pule kidei ki nongkit tiensyiem bad kum ki lawei jong ka pateng , kin sa kylla long ki heh ki haiñ ha ki snem kiban wan da ka bor jong ka jingdon ia ka jingstad lada ki kynthuplang ia ka jingpule kot haka jingim ka jongki kaba man la ka sngi.
Kiwei pat ki heh ki haiñ kiba la donlang ha ka jingialang ki kynthup ia u Swapnil Tembe uba long u Director ka tnad pule puthi bad DD Shira, Director, ka Arts & Culture.
Watla ka jingplie ia ka Book Fair kala long hapdeng ka jingjur slap hynrei kala long pat kaba ai mynsiem da ka jingwan iashimbynta ki khynnah skul ha kane ka sngi nyngkong.
Kila don palat 300 ngut na palat 10 tylli ki skul ha ka nongbah kila wan poi sha kane ka iew die kot bad ha kane ka sngi plie la pynlong ar tylli ki jingiakob na ka bynta ki khynnah skul kiba kynthup ia ka jingiakob dro dur halor ka phang ‘My City, My Shillong’ and ‘When I Grow Up’ bad ka jingai jingkren halor ka mat Rashtriya e-Pustakalaya.
