Agartala, Nailar 19 : Uwei u shipai Border Security Force (BSF) uba la mynsaw jur hadien ka jingshah thombor ha ki lehnoh ha Tripura hajan khappud ka India-Bangladesh, u la khlad noh hynne ka sngi Thohdieng hapoh ka hospital ha Agartala.
Ia une u shipai BSF la tip kyrteng kum u Grijesh Kumar Uddey 53 snem rta.U Uddey u dei u havildar hapoh ka tnat shipai BSF jong ka 145 battalion.Une u shipai ula shah siat haduh saw kuli na ki bynta bapher bapher jong ka met.Ia ka met ba sah jong u la pynkit noh shapoh GB hospital na ka bynta ban pyndep ia ki jingdonkam baroh.
Ha kawei pat ka bynta, ki tyllong khubor hapoh ka tnat syntiat ka Tripura ki la ong ba ia katei ka kam thombor la leh da ki dkhot jong ka kynhun seng lehnoh NLFT kaba dei na ka kynhun ba la lamkhmat da u Biswa Mohan Debbarma.
Ka jingkhynra kaba jur ka dang iai bteng ha katei ka thain khnang ban lapdien ia ki lehnoh kiba donkti ha katei ka kam thombor kaba la jia kynsan kynsan.
Ki lehnoh kila ther kuli kynsan sha ki bor shipai BSF ki ba don ha Shimnapur border out-post (BOP) kaba hap hapoh Anandabazar police station shatei ka district jong ka Tripura. Kine ki lehnoh la ong ba kila ther kuli sha ki BSF na u pud u sam jong ka Bangladesh.
Katkum ki tyllong khubor, ki shipai BSF ka BOP-2 ki dang iaid pahara ha kitei ki jaka khappud hynne ka step sngi Thohdieng, hadien ba kila ngat kynsan kynsan ha ka jingshah ther kuli ha ki lehnoh.
Na ka liang ki bor shipai BSF ruh kila pynphai kuli markylliang kaba la pynlong ia kine ki lehnoh ba kin phet krad noh sha ki jaka rieh ki jong ki hapoh Bangladesh.
Na ka liang u superintendent of police (SP) ka North Tripura district ula her mardor sha katei ka jaka ba la jia ka jingiather kuli ha ryngkat ka kynhun ki pulit.Kumjuh na ka liang u DIG ki BSF ruh ula her mardor sha katei ka jaka da ka liengsuin helicopter.
