Thalain u CEM ka JHADC ia ka VPP ba kwah burom halor ka jingpynioh pisa ban siew tulop ki Nongtrei

Shillong, Nailur 30 : U Chief Executive Member (CEM) ka JHADC Bah Thombor Shiwat ha ka sngi Nyngkong, ula thalain tyngeh ia ka Voice of the People Party (VPP) halor ka jingpyrshang ban kam trai ia ka sienjam jong ka Executive Committee ka NPP ban pynioh pisa na ka bynta ban pyllait ia ka tulop ba sahteng haduh 7 bnai jong ki Nongtrei ka Council.

Haba iakren bad ki nongthoh khubor, u Bah Thombor ula ong ba ka VPP kam dei tang ka Seng Sain Pyrthei hynrei ka dei ruh kum ka kynja Sengbhalang.

Ula kynthoh ia kane halor ka jingiakhih jong ka VPP pyrshah ia ka jingslem ban pyllait ia ka tulop jong ki nongtrei ka Council.

U CEM ula kynnoh ba ka VPP kala pynlong ia ka jingiakhih tad hadien ka jingioh khubor ba ka Sorkar Jylla kan sa pyllait noh shen ia ka song pisa sha ka JHADC.

“Ka paw kumba ka VPP kala buh ia katto katne ki briew ban lum jingtip halor kane ka kam namar man ka por ba ka Sorkar Jylla ka mut ban pyllait ia ka song pisa sha ka JHADC, ki briew ka VPP ki ju wan ban pynlong ia ka jingiakhih ban pyni ba ka dei ka jingiakhih jong ka ba sa pyllait ia ka pisa” ula ong.

“Ka Sorkar Jylla kala dep nadong hadong ban pyllait ia ka song pisa hadien ba ngi la thoh ia ka shithi. Kumta, kane kam dei ka jingshimkhia ka Prah, ka dei ka jingshimkhia jong ka EC jong ngi ban pynthikna ia ka jinglait noh ka pisa na ka bynta ban siew ia ka tulop ba sahteng jong ki nongtrei” ong u Bah Thombor.

Kat kum ka jingong jong u, ka Council ka donkam kumba T. 6 klur ban siew pynkhuid ia ka tulop ba 7 bnai jong baroh ki nongtrei.

Haba kylli, une u Khliehduh ka JHADC ula ong “Ngi khmih lynti ban ioh kumba T.16 haduh T.17 klur mynta ka kynti (n aka bhah khajna ki marpoh khyndew) bad ka Sorkar ka dang pynkhreh ia baroh ki jingdonkam ba hap pyndep”.

Haba niew ia ka jingiakhih ka VPP kum ka kam ka bym don jingmut, u Bah Thombor ula ong “ War lada ki wan iakhih shisngi ne man ka sngi ruh, lada ka pisa ka don ngin siew noh ia ka tulop hynrei haba ka pisa kam don, ngin ym lah leh eiei satia”.

Ula kynthoh ba ka jingiakhih ka VPP ka dei tang ka buit leh politics halor kane ka kam namar ba kala jan ka elekshon MDC.